რაც სასიამოვნოა, ყველაფერი იწვევს დამოკიდებულებას: თრობა, ჭამა, თამაში... გამონაკლისი არც სექსია. როგორ მივხვდეთ, როცა სექსის სიყვარული ავადმყოფობაში გადადის და რა ზიანი მოაქვს ამ გატაცებას?

სექსზე დამოკიდებული ადამიანების ცხოვრება სავსეა უსიამოვნებებით, რომელსაც როგორც წესი, თავადვე ქმნიან. იმპულსურობა, რომელიც რაციონალურ აზროვნებას წინ უსწრებს, მათ ხშირად უქმნის პრობლემებს.

ორმაგი ცხოვრება

სექსზე დამოკიდებული ადამიანები დახელოვნებულნი არიან ტყუილში. ზუსტად არავინ იცის, სად იმყოფებიან ისინი დროის ამა თუ იმ მონაკვეთში, ან ვისთან აქვთ ურთიერთობა. მათ შეუძლიათ, ითამაშონ, თითქოს უამრავი საქმე აქვთ, რეალურად კი ერთი პარტნიორიდან მეორესთან გადაინაცვლონ. ჩვეულებრივი ადამიანები ცოტას საუბრობენ სექსუალურ ცხოვრებაზე, თუმცა, არც იმის აღიარება უქმნით პრობლემებს, რომ პარტნიორი ჰყავთ. როცა სექსით გატაცება საშიშ ფორმებს იძენს, ლექსიკონიდან სქესობრივ აქტთან დაკავშირებული ყველა სიტყვა თუ ხუმრობა ქრება.

მომხმარებლური დამოკიდებულება სხვებისადმი

სექსზე დამოკიდებული ადამიანები უცხოპლანეტელები არ არიან. მათ უყვართ ბავშვები, ცხოველები, ოჯახის წევრები, მაგრამ როცა საქმე სექსზე მიდგება, წარმოუდგენელი ნაბიჯების გადადგმა შეუძლიათ მიზნის მისაღწევად. ისინი არ ფიქრობენ, რა მოჰყვება სექსს ან გული ეტკინება თუ არა პარტნიორს. ყველა გოგო თუ ბიჭი უბრალოდ სათამაშოა, რომელიც უნდა გამოიყენო და დაივიწყო.

დაუსრულებელი კრიზისი

როცა სექსი პრიორიტეტი ხდება, საქმე და პირადი ცხოვრება ყირაზე დგება. სამსახურში საქმეზე ვერ კონცენტრირდები, რადგან ყველა თანამშრომელი პოტენციური პარტნიორია. აქედან გამომდინარე, შენი ცხოვრება მუდამ კრიზისულ მდგომარეობაშია და ნებისმიერი პატარა სირთულის გადალახვაც კი დიდ პრობლემას წარმოადგენს. თუ შენი სექსუალური თავგადასავლები ხელს გიშლის კარიერაში, ოცნებების ასრულებასა და სტაბილურობის პოვნაში, ეს იმას ნიშნავს, რომ სექსზე დამოკიდებული ხარ.

საზღვრების არარსებობა

შეიძლება სექსში გამოუსწორებელი არამზადა იყო, თუმცა პარტნიორების შერჩევისას რეალური პრინციპებით ხელმძღვანელობდე. თუ აკრძალული ხილი განსაკუთრებით მიმზიდველია შენთვის და გამიზნულად მიდიხარ რისკზე, ესე იგი, პრობლემა გაქვს.

ხშირი მასტურბაცია

დილას, ლანჩამდე, ლანჩის შემდეგ, ხანდახან სექსის შემდეგაც.. უფრო მარტივად რომ ვთქვათ, თუ კვირაში 20 ან 30-ჯერ მასტურბირებ, სიმართლეს თვალი უნდა გაუსწორო.

სექსზე დამოკიდებულება ისეთივე დაავადებაა, როგორიც ნარკომანია ან აზარტული თამაშებით ავადმყოფური გატაცება. ამიტომ დაფიქრდით, იქნებ ფსიქოლოგის დახმარება გჭირდებათ?