ევროკავშირმა საქართველოს, Covid-19-ის კრიზისის დასაძლევად, 60 მილიონი ევროს [დაახლოებით, 240 მილიონი ლარი] ოდენობის გრანტი გამოუყო. ევროკავშირის საქართველოს წარმომადგენლობაში აცხადებენ, რომ აღნიშნული სახსრები საქართველოს მთავრობის ანტიკრიზისული ეკონომიკური გეგმის განხორციელების მხარდასაჭერადაა განკუთვნილი.

"ევროკავშირი აგრძელებს საქართველოს მტკიცე მხარდაჭერას პანდემიის პერიოდში. აღნიშნული 240 მილიონი ლარის ოდენობის გრანტი არის იმ 1.5 მილიარდი ლარის მოცულობის დახმარების ნაწილი, რომლის მობილიზება ევროკავშირმა და ევროპის გუნდმა მიმდინარე წლის გაზაფხულზე მოახდინა და რომელიც მიზნად ისახავს საქართველოს მთავრობის მხარდაჭერას პანდემიასთან ბრძოლაში, აგრეთვე, საქართველოს მოქალაქეების მხარდაჭერას იმ მწვავე გამოწვევებთან გამკლავებაში, რომელთა წინაშეც ძალიან ბევრი ადამიანი აღმოჩნდა", — აცხადებს ევროკავშირის ელჩი საქართველოში, კარლ ჰარცელი.

აღნიშნული სახსრები პირველი ტრანშია იმ 75 მილიონი ევროდან [300 მილიონი ლარი], რომელიც "Covid-19-ის მიმართ საქართველოს მდგრადობის ხელშეკრულებით" არის განსაზღვრული და რომლის მეშვეობითაც ევროკავშირი საქართველოს ანტიკრიზისული ეკონომიკური გეგმის განხორციელებაში დაეხმარება. გეგმა მოიცავს ღონისძიებებს, რომელთა მიზანი შემოსავლის წყაროების დაკარგვით გამოწვეული ნეგატიური ზეგავლენის შემცირება, სამუშაო ადგილების შენარჩუნების ხელშეწყობა, ბიზნესის მხარდაჭერა და ჯანდაცვის სისტემის გაძლიერებაა. მათივე განცხადებით, ევროკავშირის მიერ უზრუნველყოფილი დახმარების მთავარ მიზანს პანდემიის უარყოფითი შედეგების გამოსწორებაში საქართველოს მოქალაქეებისა და ბიზნესების მხარდაჭერა წარმოადგენს.

აღნიშნული სახსრების გამოყოფის შესახებ გადაწყვეტილება მთავრობის ანტიკრიზისული ეკონომიკური გეგმის, ეკონომიკური პოლიტიკის, სახელმწიფო ფინანსური რესურსების მართვისა და ბიუჯეტის გამჭვირვალობის დადასტურების შემდეგ მიიღეს. დარჩენილი თანხის გამოყოფა მთავრობის მიერ გატარებული ზომების შეფასების საფუძველზე მოხდება, რომლებიც სოციალურად დაუცველი ოჯახებისთვის სოციალური დახმარების გაწევას, ბიზნესების მხარდაჭერას სამუშაო ადგილების შენარჩუნების კუთხით და ინტენსიური თერაპიის საწოლების რაოდენობის გაზრდას შეეხება.

აღნიშნულ ტრანშს წინ უსწრებდა მაკროფინანსური დახმარებისთვის 100 მილიონი ევროს [400 მილიონი ლარის] ოდენობის სესხის გამოყოფა, რომელიც მიმდინარე წლის 25 ნოემბერს განხორციელდა. ორივე ტრანში არის 1.5 მილიარდი ლარის მოცულობის მთლიანი დახმარების პაკეტის ნაწილი, რომელიც, ასევე, ითვალისწინებს საქართველოს ჯანდაცვის სისტემის, სოციალური სფეროსა და ეკონომიკის აღდგენის მხარდაჭერას.