ბელარუსის პოლიციამ აქციაზე 100-ზე მეტი დემონსტრანტი დააკავა. ამის შესახებ ინფორმაციას ბელარუსის უფლებადამცველი ორგანიზაცია VIASNA-96 ავრცელებს.

REUTERS-ის ინფორმაციით, მომიტინგეების ნაწილმა ბელარუსის დედაქალაქ მინსკსა და სხვა ქალაქებში მსვლელობა გამართეს. ქვეყანაში პრეზიდენტის, ალექსანდრე ლუკაშენკოს გადადგომის მოითხოვენ.

მომიტინგეების ნაწილი მინსკის გვერდით რაიონებში შეიკრიბა. მათ თან ჰქონდათ თეთრი დროშები შუაში წითელი ზოლით, ოპოზიციის სიმბოლოთი და სკანდირებდნენ — "გაუმარჯოს ბელარუსს".

ბელარუსში საპროტესტო აქციები 9 აგვისტოს ჩატარებული საპრეზიდენტო არჩევნების შედეგების გამოცხადებისთანავე დაიწყო და დღემდე გრძელდება. მოსახლეობა არჩევნების შედეგებს არ აღიარებს. დემონსტრანტები პრეზიდენტის, ალექსანდრ ლუკაშენკოს გადადგომასა და ხელახალი არჩევნების ჩატარებას მოითხოვენ. ადგილობრივი საარჩევნო კომისიის მიერ გამოქვეყნებულ არჩევნების შედეგებს გაერთიანებული ოპოზიციის კანდიდატი, სვეტლანა ტიხანოვსკაიაც არ ეთანხმება, რომელიც შედეგების გამოცხადების შემდეგ იძულებული გახდა, ქვეყანა დაეტოვებინა. მისი ინიციატივით, ძალაუფლების მშვიდობიანი გადაბარებისთვის საკოორდინაციო საბჭო შეიქმნა.

ევროპარლამენტმა ბელარუსში აგვისტოში ჩატარებულ არჩევნებს გაყალბებული უწოდა და არ აღიარა. ევროპარლამენტის თქმით, ლუკაშენკოს 5 ნოემბრიდან, როცა მისი უფლებამოსილების ვადა ამოიწურება, პრეზიდენტად აღარ აღიარებენ.

6 ნოემბერს ევროკავშირმა 15 ბელარუს მაღალჩინოსანს, მათ შორის პრეზიდენტის, ალექსანდრ ლუკაშენკოს წინააღმდეგ სანქციები აამოქმედა. სანქციები მოიცავს ევროკავშირის ტერიტორიაზე მოგზაურობის შეზღუდვას და საბანკო ანგარიშების გაყინვას.