ნაციონალური მოძრაობის ერთ-ერთი ლიდერის, ხატია დეკანოიძის თქმით, ISFED-ის მიერ გამოქვეყნებული განცხადება, რომლის მიხედვითაც პარალელურ დათვლაში მიღებული ხმების გამოსათვლელ ფორმულაში ხარვეზი გამოვლინდა, ფარული მიყურადებისა და დახურულ მონაცემთა ბაზაში შეღწევის ღია მაგალითია. ამის შესახებ ის საკუთარ ფეისბუქზე წერს.

მისი თქმით, აღნიშნულში ყველაზე მთავარი რამდენიმე პუნქტია, კერძოდ ის თუ როგორ გაიგო ქართულმა ოცნებამ ISFED-ის ცდომილებაზე. დეკანოიძე აღნიშნავს იმასაც, რომ "ნორმალურ ქვეყანში" ამაზე "დიდი ამბავი ატყდებოდა" და გამოძიება დაიწყებოდა.

"8-პროცენტიანი დისბალანსი ოქმებში არ გამქრალა, რაც რამდენიმე პროცენტს ისედაც სცდება. ISFED არ ითვლის ხმებს, ითვლის ოქმებს. ამავე დროს, გასაჩივრებული ოქმებიც არ დაუკმაყოფილეს", — წერს დეკანოიძე.

ISFED-ის ცნობით, ხმების პარალელური დათვლის პირველადი შიდა აუდიტის შედეგებმა PVT მეთოდოლოგიის სიზუსტე და დამკვირვებლების მიერ მოწოდებული ინფორმაციის სანდოობა დაადასტურა. თუმცა გამოვლინდა ხარვეზი საარჩევნო სუბიექტების მიერ მიღებული ხმების გამოსათვლელ ფორმულაში.

მანამდე ცნობილი გახდა, რომ მმართველი პარტიის წარმომადგენლები ISFED-ს შეხვდნენ. ქართულ ოცნებაში აცხადებდნენ, რომ შეხვედრა ISFED-ის მიერ ჩატარებული პარალელური ხმის დათვლის შედეგებს ეხებოდა და მათ ორგანიზაციას მეთოდოლოგიის შესახებ მონაცემების წარმოდგენა მოსთხოვეს.