საქართველოს ფინანსთა სამინისტროს საგამოძიებო სამსახურმა უაქციზო სიგარეტის გაყიდვის ფაქტი გამოავლინა. ამის შესახებ ინფორმაციას უწყების პრესსამსახური ავრცელებს.

„გამოძიებით დადგენილია, რომ ბრალდებულმა, საკუთარ სავაჭრო ობიექტში, სხვადასხვა ფიზიკურ პირებზე მალულად გაასაღა მარკირებას დაქვემდებარებული უაქციზო სიგარეტი მასტერი. საგამოძიებო სამსახურის მიერ უაქციზო თამბაქოს ნაწარმი ამოღებულია ნივთმტკიცების სახით,“ - აღნიშნულია საგამოძიებო სამსახურის მიერ გავრცელებულ ინფორმაციაში.

საგამოძიებო სამსახურის პრესსამსახურის ინფორმაციით, გამოძიება საქართველოს სისხლის სამართლის კოდექსის მე-200 და 210-ე მუხლებით მიმდინარეობს.

კოდექსის მე-200 მუხლის მიხედვით, აქციზური მარკის სავალდებულო დართვას დაქვემდებარებული საქონლის მარკის გარეშე გამოშვება, შენახვა, რეალიზაცია ან გადაზიდვა ისჯება ჯარიმით ან თავისუფლების აღკვეთით ვადით ორიდან ოთხ წლამდე. ამ დარღვევისთვის სისხლისსამართლებრივი პასუხისმგებლობა დგება, როდესაც საქონლის ღირებულება აღემატება ორი ათას ლარს.

იგივე ქმედება, ჩადენილი: არაერთგზის, დიდი ოდენობით ან ჯგუფის მიერ ისჯება თავისუფლების აღკვეთით ვადით ოთხიდან ექვს წლამდე. იგივე ქმედება განსაკუთრებით დიდი ოდენობის შემთხვევაში ისჯება თავისუფლების აღკვეთით ვადით ექვსიდან რვა წლამდე.

ამავე კოდექსის 210-მუხლით კი, ყალბი საკრედიტო ან საანგარიშსწორებო ბარათის, სხვა საგადასახადო დოკუმენტის ან ქონებრივი უფლებამოსილების დამადასტურებელი ისეთი დოკუმენტის დამზადება ან შეძენა გასაღების ან გამოყენების მიზნით, გასაღება ან გამოყენება, რომელიც არ არის ფასიანი ქაღალდი ისჯება ჯარიმით ან გამასწორებელი სამუშაოთი ვადით ორ წლამდე, ან თავისუფლების შეზღუდვით ვადით სამ წლამდე, ანდა თავისუფლების აღკვეთით ვადით ორიდან ოთხ წლამდე.

იგივე ქმედება, ჩადენილი: ჯგუფურად ან არაერთგზის ისჯება ჯარიმით ან თავისუფლების აღკვეთით ვადით ოთხიდან შვიდ წლამდე.