ლელოს გენერალური მდივნის, ბადრი ჯაფარიძის განცხადებით, ისინი უარს ამბობენ მანდატებზე და პარტიულ სიასაც გაანულებენ, თუმცა დიალოგს გააგრძელებენ. ამის შესახებ მან პარტიის ოფისში გამართულ ბრიფინგზე განაცხადა.

"ეს არ ნიშნავს, რომ ჩვენ უარს ვამბობთ დიალოგზე ქართულ ოცნებასთან. დიალოგს ჩვენ გავაგრძელებთ, რათა შევთანხმდეთ ვადამდელ არჩევნებთან დაკავშირებით იმიტომ რომ ჩვენ უნდა განვმუხტოთ პოლიტიკური კრიზისი. პოლიტიკური კრიზისი კი მხოლოდ იმ შემთხვევაში განიმუხტება, თუ შევჯერდებით ვადამდელ არჩევნებზე და არჩევნების ჩატარების სისტემაზე და ახლა ადმინისტრაციაზე", — აღნიშნა ჯაფარიძემ.

როგორც ჯაფარიძემ თქვა, ელჩებთან მოლაპარაკებების გადადება ქართული ოცნების მიერ 9 დეკემბერს გაკეთებულმა განცხადებებმა განაპირობა:

"როცა შენ ემზადები მოლაპარაკებებისთვის და წინა დღეს აცხადებს, რომ შესაძლებელია ერთ-ერთ პარტიის რეგისტრაციის გაუქმებაზე დაიწყო მუშაობა და ამავდროულად შეუწყვიტო დაფინანსება ყველა იმ პარტიას, რომელიც გადაწყვეტილებას მიიღებს არ შევიდეს პარლამენტში, მე ვფიქრობ, ასეთი განცხადებები ანგრევს მოლაპარაკებების ატმოსფეროს", — აღნიშნა ჯაფარიძემ.

ხვალ მეათე მოწვევის პარლამენტის პირველი სხდომა უნდა ჩატარდეს, რომელსაც ოპოზიცია არ დაესწრება. ბარიერგადალახული ოპოზიციური პარტიები 31 ოქტომბრის არჩევნების შედეგებს არ აღიარებენ და მანდატებზე უარს ამბობენ. ისინი გეგმავენ, რომ სხდომის პარალელურად ხელი მოაწერონ ერთობლივ განცხადებას, რომლითაც სადეპუტატო მანდატებზე უარს იტყვიან.

9 დეკემბერს პარტია მოქალაქეების ლიდერმა, ალეკო ელისაშვილმა ფეისბუქლაივის დროს განაცხადა, რომ საარჩევნო კანონმდებლობისა და საარჩევნო ადმინისტრაციების რეფორმებზე შეთანხმების შემთხვევაში პარლამენტში შევა.

როგორც ელისაშვილმა მოგვიანებით განმარტა, ქართულმა ოცნებამ დაიხია ყველა საკითხზე, რომელიც ოპოზიციამ მოლაპარაკებების მაგიდასთან დააყენა. მისივე თქმით, ევროპული საქართველო მოლაპარაკებების ჩაშლას ცდილობს.

ამავე თემაზე: