გერმანულმა პოლიციამ ქალაქ ტრირის მახლობლად 67 წლის კაცი დააკავა, რომელიც უკანასკნელი 40 წლის განმავლობაში მართვის მოწმობის გარეშე გადაადგილდებოდა მანქანით. პოლიციის განცხადებით, საბუთის მოთხოვნისას მძღოლმა მათ ყალბი მოწმობა წარუდგინა, რომელიც ირწმუნებოდა, რომ ნამდვილი საბუთი პოლიციის სხვა განყოფილებაში იყო მიტანილი.

როცა წარდგენილი საბუთის სიყალბე დამტკიცდა, ტრირის პოლიციასთან კაცმა აღიარა, რომ უკვე 40 წელია, რაც მართვის მოწმობის გარეშე მოძრაობდა. ამასთან, იგი რამდენიმე წლის განმავლობაში დისტრიბუციის მძღოლიც კი იყო.

ცხადია, კაცის წინააღმდეგ საქმე აღიძრა.

საინტერესოა, რომ გერმანიაში მსგავსი შემთხვევები არცთუ იშვიათია. მიმდინარე წლის ივლისში პოლიციამ 69 წლის ქალი დააკავა, რომელიც 39 წლის განმავლობაში მანქანით მართვის მოწმობის გარეშე მოძრაობდა. ამის აღმოჩენა მხოლოდ მაშინ მოხერხდა, როცა ავტოსადგომზე სხვა მანქანას დაეჯახა და გზა ისე განაგრძო, თითქოს არაფერი მომხდარა.

გერმანიაში მართვის მოწმობის გარეშე მანქანით გადადგილება ისჯება — ჯარიმით ან თავისუფლების აღკვეთითაც კი. იმის გათვალისწინებით, თუ რამდენად მძიმეა დანაშაული ან რამდენად ხშირადაა ეჭვმიტანილი შემჩნეული მსგავს დანაშაულში, პოლიციას ტრანსპორტის ჩამორთმევაც კი შეუძლია.

2014 წელს ბორუსია დორტმუნდის საფეხბურთო კლუბის მოთამაშე მარკო როუზი 540 000 ევროთი დაჯარიმდა მართვის მოწმობის გარეშე ძვირადღირებული მანქანით გადაადგილების გამო. მსგავს დანაშაულებებზე პროპორციული სასჯელის გასათვალისწინებლად გერმანიაში ჯარიმა დამნაშავის შემოსავლის მიხედვით გამოითვლება.

ქვეყანაში ასევე კანონით ისჯება ოფიციალური დოკუმენტის გაყალბებაც. დანაშაულის სიმძიმის მიხედვით სასჯელი, ჯარიმასთან ერთად, შესაძლოა, თავისუფლების 5 წლით აღკვეთაც კი იყოს.