ჯანდაცვის მინისტრის, ეკატერინე ტიკარაძის განცხადებით, ინფორმაციის გავრცელება იმის შესახებ, რომ ბიძინა ივანიშვილის შვილს რუსეთის მოქალაქეობა აქვს, ივანიშვილის ოჯახზე ნეგატივის წარმოქმნას ემსახურება, რათა მოსახლეობას მისდამი ნდობა დაეკარგოს. მინისტრი მიიჩნევს, რომ ეს "პირდაპირპროპორციულად მიმართულია ჩვენი ქვეყნის რეგრესზე და უკანსვლაზე".

"ბოლო დღეების განმავლობაში იმდენი ფეიქნიუსი იქნა გასული ჩვენი ტელეკომპანიების საშუალებით, ჩემთვის ესეც არის შემქნილი სიუჟეტი, რომელიც ემსახურება მხოლოდ და მხოლოდ ბატონი ბიძინა ივანიშვილის ოჯახზე კიდევ დამატებით ნეგატივის წარმოქმნას იმისათვის, რომ მოსახლეობას დაეკარგოს მისდამი ნდობა, გამოიწვიოს მოსახლეობის აგრესია, რაც შესაბამისად, პირდაპირპროპორციულად მიმართულია ჩვენი ქვეყნის რეგრესზე და უკანსვლაზე. ჩვენ ვართ მომხრე საქართველოს ევროპული განვითარების, დემოკრატიული განვითარების და ვგმობთ მსგავს ფეიქნიუსებს, ვინაიდან, მსგავს ხერხს ჩვენ ოპონენტების მიმართ არ ვიყენებთ", — აცხადებს ტიკარაძე.

5 დეკემბერს TV პირველმა გაავრცელა ინფორმაცია, რომ ბიძინა ივანიშვილის უფროს შვილს, უტა ივანიშვილს რუსეთის მოქალაქეობა აქვს.