სახალხო დამცველმა უჩა ნანუაშვილმა განაცხადა, რომ ქართულმა მხარემ მაქსიმალურად უნდა დაიცვას გიორგი ცერცვაძის უფლებები და თავიდან აირიდოს მისი ექსტრადიცია რუსეთში:

"ქართულმა სახელმწიფომ მაქსიმალურად უნდა დაიცვას საკუთარი მოქალაქე ნებისმიერი მეთოდის გამოყენებით. აქ არის ყველაზე მნიშვნელოვანი მომენტი ის, რომ სახელმწიფომ დაიცვას ამ ადამიანის უფლებები და მაქსიმალურად ყველაფერი გააკეთოს, რომ ავირიდოთ მისი ექსტრადიცია მტრულ სახელმწიფოში".

უჩა ნანუაშვილის თქმით, ისინი დაინტერესებულები არიან ამ საქმით და სწავლობენ, თუ რამდენად არის რეალობა, რა ინფორმაციაც ვრცელდება.

ქართველი ჯარისკაცი, გია ცერცვაძე, რომელიც რუსთავი 2-ის ინფორმაციით აფხაზეთის ომში, ასევე 2008 წელს, რუსეთის თავდასხმისას, საქართველოსთვის იბრძოდა, 1 კვირის წინ უკრაინაში დააპატიმრეს.

რუსთავი 2-ის ინფორმაციით, რუსეთიდან უკრაინაში გადაგზავნილ საქმის მასალებში წერია, რომ ქართველ ჯარისკაცს 2003 წელს რუსეთში ჩადენილი მკვლელობისთვის ეძებენ.