თბილისის სახელმწიფო უნივერსიტეტის თვითმმართველობის პრეზიდენტი, შალვა საბაური და ვიცე-პრეზიდენტები - თორნიკე ცინაძე და პაატა ბახტურიძე თანამდებობიდან გადადგნენ. როგორც On.ge-ს საბაურმა განუმარტა, დღეს, 19 საათზე თსუ-ს თვითმმართველობის საერთო კრება გაიმართება, რომელზეც გაირკვევა, თუ ვინ გახდებიან მისი და ვიცე-პრეზიდენტების მოვალეობების შემსრულებლები.

საბაურის განმარტებით, აღნიშნული თანამდებობების დატოვების ორი მიზეზი არსებობდა: ერთი ის, რომ თვითმმართველობის პრეზიდენტსა და ვიცე-პრეზიდენტებს ნათქვამი ჰქონდათ, რომ თუ თსუ-ს რექტორი დატოვებდა თანამდებობას, ისინიც გადადგებოდნენ. საბაურის თქმით, მათი უფლებამოსილების შეწყვეტის მეორე მიზეზი არის ის, რომ ერთი და იგივე მმართველი გუნდი თვითმმართველობაში 2 წელზე მეტი არასდროს ყოფილა, ისინი კი აღნიშნულ თანამდებობებს უკვე 2 წელია იკავებენ.

რაც შეეხება თვითმმართველობის მორიგ არჩევნებს, მისი თქმით, ის 6 თვის შემდეგ უნდა ჩატარდეს.

თსუ-ს თვითმმართველობის მმართველი გუნდი, აუდიტორია 115-ის აქციების პარალელურად, ამბობდა, რომ თუ რექტორი ვლადიმერ პაპავა გადადგებოდა, ისინიც დატოვებდნენ დაკავებულ თანამდებობას. პაპავას გადადგომის მოთხოვნით მათ შიმშილობაც გამოაცხადეს. მოგვიანებით, თსუ-ს რექტორი გადადგა, ხოლო მისი მოვალეობის შემსრულებლად, არჩევნების გზით, დარეჯან თვალთვაძე დანიშნეს.