თბილისის სახელმწიფო უნივერსიტეტში აკადემიური საბჭოს პირველი ეტაპის არჩევნები დღეს, 11 მაისს, 10 საათზე დაიწყო და 5 საათზე დასრულდება. არჩევნებში 33 კანდიდატი იღებს მონაწილეობას, რომელთაგან საბოლოოდ 14 უნდა აირჩიონ.

საარჩევნო უბნები თსუ-ს 7 ფაკულტეტზე გაიხსნა. სულ 791 ამომრჩეველია რეგისტრირებული, საიდანაც 726 აკადემიური პერსონალია, 65 კი საფაკულტეტო საბჭოს თვითმმართველობის წევრი სტუდენტია.

როგორც საარჩევნო კომისიის თავჯმდომარემ, ირაკლი დვალიძემ ჟურნალისტებთან საუბარში განმარტა, თითოეულ ფაკულტეტზე აკადემიური საბჭოს 2 წევრი უნდა აირჩიონ, შესაბამისად ამომრჩეველსაც ორი წევრის შემოხაზვის საშუალება აქვს.

მისი თქმით, არჩევნების დასრულებისთანავე ფაკულტეტების შესაბამისად შექმნილი 7 ქვეკომისია ხმების დათვლას დაიწყებს, შემაჯამებელ აქტებს გამოსცემს, რის შემდეგაც საბოლოო შედეგს ცენტრალური საარჩევნო კომისია გამოავლენს. დვალიძის განმარტებით, არჩევნები ჩატარებულად მხოლოდ იმ შემთხვევაში ჩაითვლება თუ რეგისტრირებულ ამომრჩეველთა ნახევარზე მეტი მიიღებს მასში მონაწილეობას.

11 საათზე თსუ-ს პირველ კორპუსში გახსნილ საარჩევნო უბანზე ხმის მისაცემად თსუ-ს რექტორის მოვალეობის შემსრულებელი, დარეჯან თვალთვაძეც მივიდა. ჟურნალისტებთან საუბარში მან განმარტა, რომ დღეს გამართული არჩევნები აკადემიური საბჭოს არჩევის პირველი ეტაპია, რადგან მოგვიანებით, როდესაც თსუ-ს პროფესორთა საინიციატივო ჯგუფის მიერ შემუშავებულ ცვლილებათა პაკეტს სენატი დაამტკიცებს, საბჭოს შემადგენლობა კიდევ გაფართოვდება:

"წესდებაში შევა ცვლილება, რომელზეც მუშაობა უკვე მიმდინარეობს და შესაძლებელი გახდება აკადემიურ საბჭოში ახალი წევრების არჩევა, დამატებით ფაკულტეტის წარმომადგენლების, ასევე უნივერსიტეტთან შემოერთებული სამეცნიერო კვლევითი ინსტიტუტების წარმომადგენლების. აკადემიური საბჭოს გაფართოებული არჩევნების დასრულება 1 ივნისამდე გვაქვს დაგეგმილი, უფრო კონკრეტულად, როდის ჩატარდება, ცნობილი მას შემდეგ გახდება, რაც წესდებაში ცვლილებები შევა".

თვალთვაძის თქმით, წესდებაში ცვლილებების შეტანის შემდეგ, სენატის გადაწყვეტილების შესაბამისად, აკადემიური საბჭოს საბოლოოდ ან 38, ან 45 წევრით დაკომპლექტდება:

"შესაბამისად, კანონის მიხედვით, მინიმუმ უნდა გაორმაგდეს სენატის შემადგენლობაც".

ჩვენს შეკითხვას, როდის აირჩევს უნივერსიტეტი რექტორს, თვალთვაძემ უპასუხა, რომ ეს მხოლოდ მას შემდეგ მოხდება, რაც თსუ-ს აკადემიური საბჭო სრულად დაკომპლექტდება, რადგან რექტორი სწორედ მან უნდა აირჩიოს.

თვალთვაძემ ასევე განაცხადა, რომ არჩევნების შედეგად გამოვლენილი აკადემიურ საბჭოს ფუნქციონირების ვადა იმ დრომდე ექნება, რა დრომდეც უკვე უფლებამოსილება შეწყვეტილ საბჭოს უნდა შეესრულებინა თავისი ფუნქცია:

"ეს არის, გარკვეული ნაწილისთვის 2 წელი, გარკვეული ნაწილისთვის კი - ოქტომბრამდე".

თსუ-ში მიმდინარე არჩევნებს ახალგაზრდა იურისტთა ასოციაცია, ფონდი ღია საზოგადოება საქართველო, განათლების მხარდამჭერთა ასოციაცია ახალგაზრდა ადვოკატები და ინდივიდუალური დამკვირვებლები აკვირდებიან.

თსუ-ს არსებულ აკადემიური საბჭოს წევრებს უფლებამოსილება 16 მაისიდან შეუწყდება.