დღეს, 14 მაისს, აუდიტორია 115-ს წარმომადგენლებსა და პრემიერ მინისტრის წარმომადგენელს შორის, განათლების სამინისტროში გამართულ შეხვედრაზე, იმ კანონპროექტის შინაარსზე შეთანხმდნენ, რომელსაც განათლების სამინისტრო პარლამენტს უახლოეს დღეებში წარუდგენს.

On.ge-სთან საუბარში აუდიტორია 115-ის წევრმა, ანა კამლაძემ განმარტა, რომ დღევანდელი შეხვედრის შედეგად შეთანხმდნენ კანონპროექტის შინაარსზე, რომელიც უმაღლესი განათლების შესახებ კანონში შემდეგ ცვლილებებს ითვალისწინებს:

  • რექტორის მოვალეობის შემსრულებელს აირჩევენ 6 თვის ვადით. მას რექტორის თანამდებობაზე კენჭისყრის უფლება არ ექნება.
  • უნივერსიტეტის აკადემიურ საბჭოში სტუდენტებს პირდაპირი წესით აირჩევენ ანუ მათ ჯერ თვითმმართველობის არჩევნებში მონაწილეობა აღარ მოუწევთ იმისთვის, რომ საბჭოს წევრები გახდნენ.
  • თვითმმართველობის დღევანდელი ინსტიტუტის ფუნქციონირება, რომელიც რამდენიმე დღეში თავის უფლება-მოვალეობის შესრულებას ამთავრებს, საერთოდ შეჩერდება და მისი ალტერნატივა შეიქმნება:

"აღარ ჩატარდება [თვითმმართველობის] არჩევნები და გარდამავალ პერიოდში, დაახლოებით ერთი წლის ვადა დავთქვით, საერთოდ არ იარსებებს სტუდენტური თვითმმართველობა. ამ პერიოდში ახალი მოდელი უნდა შემუშავდეს, რომელიც შემდეგ არსებობას განაგრძობს".

მისი თქმით, აღნიშნული ცვლილების განსახორციელებლად შეიქმნება პლატფორმა, რომელშიც სხვადასხვა უნივერსიტეტის სტუდენტები და ლექტორები იქნებიან ჩართულები და თვითმმართველობის ალტერნატივის შექმნის იდეაზე იმუშავებენ:

"თუმცა, ჩვენთვის არანაირ პრობლემას არ წარმოადგენს ის, რომ საერთოდ აღარ არსებობდეს თვითმმართველობის სტრუქტურა, რადგან მისი არსებობის აუცილებლობას ნამდვილად ვერ ხედავს აუდიტორია 115".

რაც შეეხება ე.წ. ოდეერის საკითხს, კამლაძემ განმარტა, რომ ოფიციალურად უნივერსიტეტში ოდეერები არ არიან. თუმცა, აუდიტორია 115 ითხოვდა ამ საკითხის გამოძიებას, მაგრამ კანონმდებლობით ამის გათვალისწინება ვერ მოხერხდება.

6 მაისს ცნობილი გახდა, რომ ივა კავსაძემ, რომელსაც აუდიტორია 115 ე.წ. ოდეერობაში ადანაშაულებდა თსუ თავისი ნებით დატოვა. თსუ-ს საზოგადოებასთან ურთიერთობის დეპარტამენტის წარმომადგენელმა განმარტა, რომ შიდა აუდიტმა კავსაძის უშიშროების სამსახურთან კავშირის დამადასტურებელი ფაქტები ვერ აღმოაჩინა, თუმცა კავსაძემ აღნიშნული გადაწყვეტილება მაინც მიიღო.