ქართული ოცნების ერთ-ერთი წევრის, გია ვოლსკის განცხადებით, მართლმსაჯულების სისტემის დახვეწა ჯობია ოპოზიციასთან ინტენისიური კამათის პირობებში.

"მართლმსაჯულების სისტემის შემდგომი დახვეწა არ გამომდინარეობს იქიდან, თუ რა მოსაზრებები აქვს ჩვენს რომელიმე ოპონენტ პოლიტიკურ ძალას. ეს აუცილებელია და, რასაკვირველია, ამის გაკეთება ჯობია ინტენსიური კამათის პირობებში, პოლემიკის პირობებში და ეს მოხერხდება მხოლოდ იმ შემთხვევაში, როდესაც თავის ვალდებულებებზე უარს არ იტყვიან პოლიტიკური სუბიექტები", — აცხადებს ვოლსკი.

რამდენიმე პოლიტიკური პარტია აცხადებს, რომ ბოიკოტის საპირწონე შეიძლება იყოს სასჯელაღსრულების რეფორმის აღსრულება, რომელსაც ოპოზიციამ ხელი არჩევნებამდე მოაწერა. მათი განცხადებით, ასეთ შემთხვევაში შესაძლებელია პარლამენტში შესვლა, მაგრამ ამის მზაობა ქართული ოცნების მხრიდან დღეს არ ჩანს.

31 ოქტომბრის საპარლამენტო არჩევნების შედეგებს ოპოზიცია არ აღიარებს და საპარლამენტო მანდატებზე უარს აცხადებენ. მათ არ მიიღეს მონაწილეობა 17 მაჟორიტარულ ოლქში გამართულ მეორე ტურებში. ოპოზიციური პარტიები ვადამდელი არჩევნების ჩატარებას ითხოვენ და ამ არჩევნების შედეგების გაბათილება სურთ. როგორც ოპოზიციაში ამბობენ, მათ არც საარჩევნო კამპანია ჩაუტარებიათ და საჯაროდაც მოქალაქეებს მოუწოდებდნენ, არ წასულიყვნენ არჩევნებზე.

არჩევნების დღეს ოპოზიცია აქციის ჩატარებას გეგმავდა, თუმცა საბოლოოდ მათ გადაწყვიტეს, რომ საპროტესტო ღონისძიებებს არ ჩაატარებდნენ და სრულ იგნორირებას გამოუცხადებდნენ.

ამ ხნის განმავლობაში მმართველ გუნდში ამტკიცებდნენ, რომ ოპოზიცია მეორე ტურისთვის კოორდინატორებისა და ამომრჩევლის მობილიზებას აპირებდა.

ამასთან, პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ.