მუზეუმი Holoseum სახელმწიფოს მიერ დადგენილ შეზღუდვებს არ ემორჩილება და იხსნება. ამის შესახებ ინფორმაციას ისინი საკუთარ Facebook გვერდზე აქვეყნებენ.

"მიუხედავად იმისა რომ სახელმწიფოს მიერ ძალადობრივი გადაწყვეტილების გამო მოგვიწია დახურვა შაბათ-კვირას დავბრუნდებით განახლებული ფორმით. ჩვენ არ ვაპირებთ სახელმწიფოს უნიათობას გადავაყოლოთ ჩვენი და თქვენი თავები. Reformerfitness-ს მშვენიერი ინსიპირაციაა და ჩვენც ვეცდებით ვიყოთ კიდევ დამატებითი ინსპირაცია სხვებისათვის. ჩვენთან 1000 კვადრატული მეტრი, გაშლილი ფართია. უძლიერესი განიავების და ჰაერის ფილტრაციის სისტემები და ყველა ნორმატივი რომელიც კი თქვენს უსაფრთხოებას უზრუნველყოფს, მაგრამ მაინც დაგვხურეს", — წერია განცხადებაში.

მათივე თქმით, ჰოლოზეუმში შესვლა აღარ იქნება ფასიანი არც პანდემიის და აღარც პოსტ-პანდემიის პერიოდში.

"ასევე ვითვალისწინებთ რომ დღეს ქვეყანაში უმეტესობამ დაკარგა შემოსავალი, დაკარგა ხალისი ქუჩაში გამოსვლის და ამიტომ გადაწყვეტილება მივიღეთ რომ ისეთი ახალი ფორმით გავიხსნებით რომ შეძლებთ გვესტუმროთ უფასოდ. დიახ ჰოლოზეუმი აღარ იქნება ფასიანი. აღარც პანდემიის პერიოდში და აღარც მომავალში", — წერენ ისინი.

იგივე გადაწყვეტილება მიიღო ფიტნესცენტრმა Reformerfitness, მათ აკრძალვების მიუხედავად ფუნქციონირება გააგრძელეს, რის გამოც დააჯარიმეს. აღნიშნული სივრცე ამჟამად გირჩის ერთ-ერთმა ლიდერმა, ზურაბ ჯაფარიძემ იქირავა, მისი თქმით, ეს სივრცე მისი სახლი იქნება და მსურველებს მოუწოდა, სავარჯიშოდ მივიდნენ.

უწყებათაშორისი საკოორდინაციო საბჭოს გადაწყვეტილებით, 28 ნოემბრიდან 31 იანვრის ჩათვლით, ფიტნესი და საცურაო აუზები დაიხურა. გარდა ამისა, საბჭომ არაერთი შეზღუდვა დააწესა, რომელიც მუნიციპალურ და საქალაქთაშორისო ტრანსპორტს, გადაადგილებას, ბაზრობებსა და ბაღებს ეხება. შეზღუდვები რამდენიმე ეტაპადაა დაწესებული და გათვალისწინებულია ე.წ. შემსუბუქების პერიოდი.