ჯანდაცვის მინისტრის ეკატერინე ტიკარაძის თქმით, მთავრობა მუშაობს იმისათვის, რომ კორონავირუსთან დაკავშირებული პიკი დროულად შეაჩერონ. ამის შესახებ მან საკოორდინაციო საბჭოს დასრულების შემდეგ განაცხადა.

"პიკთან დაკავშირებით ჩვენ ვგეგმავთ გარკვეულ ღონისძიებებს, მთავრობა გადის კონსულტაციებს. ჩვენი მიზანია არ დაველოდოთ პიკს არამედ მოვახდინოთ პიკის დროული შეჩერება იმისათვის, რომ ამან საშუალება მისცეს სამედიცინო სექტორს განაგრძოს ჩვეულ რეჟიმში", — განაცხადა ტიკარაძემ.

25 ნოემბერს საქართველოში კორონავირუსის 3 071 ახალი შემთხვევა დადასტურდა, გამოჯანმრთელდა — 3 366 , გარდაიცვალა — 34.

ქვეყანაში პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 114 889-ს. ჯამში გამოჯანმრთელებულთა რაოდენობა გაიზარდა 95 581-მდე. 2020 წლის 26 თებერვლიდან დღემდე სულ გვაქვს 1 085 გარდაცვალების შემთხვევა.