მარტში გათავისუფლებული სოციალური მუშაკის, თეა მაღრაძის სარჩელი თბილისის საქალაქო სასამართლომ დააკმაყოფილა. საქალაქო სასამართლოს განაჩენის საფუძველზე, სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს გათავისუფლების ბრძანების ბათილად ცნობა, იძულებითი განაცდურის ანაზღაურება და მაღრაძის სამსახურში აღდგენა დაევალა.

2020 წლის თებერვალში მთავრობის მიერ შვილად აყვანისა და მინდობით აღზრდის შესახებ კანონში ცვლილებები შევიდა, რომლის თანახმადაც, სახელმწიფო სოციალურ სააგენტოს გამოეყო გარკვეული ფუნქცია-მოვალეობები და სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს გადაეცა. მანამდე სახელმწიფო სოციალურ სააგენტოში დასაქმებული სოც.მუშაკებიც სწორედ ახალ სააგენტოში გადავიდნენ, თუმცა, არა ყველა. სოციალურმა სააგენტომ 33 სოც.მუშაკს შრომითი ხელშეკრულება შეუწყვიტა, მიზეზად კი სააგენტოში მიმდინარე რეორგანიზაცია დაასახელა. ამასთან, ტრეფიკინგის სააგენტომ რამდენიმე კვირაში გამოაცხადა კონკურსი და დაიწყო ახალი სოც.მუშაკების მოძიება.

დეტალების გასარკვევად On.ge დავით ომსარაშვილს დაუკავშირდა, რომელმაც განაცხადა, რომ სააგენტოში მიმდინარე რეორგანიზაციისას გაურკვეველი იყო, რა კრიტერიუმებით გადაარჩიეს სოციალური მუშაკები, რომელთა ნაწილი სამუშაოდ ტრეფიკინგის სააგენტოში გადავიდა, ნაწილი კი, უბრალოდ, გაათავისუფლეს. ომსარაშვილმა აღნიშნა, იყო საუბრები, თითქოს, სოც.მუშაკები კვალიფიკაციის საფუძველზე გაუშვეს, მაგრამ ეს ფაქტი არ დადასტურებულა.

"გათავისუფლების ბრძანებაში მიზეზად ეწერა რეორგანიზაცია, რომელმაც გამოიწვია კადრების შემცირება. ამ დროს, სოც.მუშაკების პროფესიული გაერთიანება ამბობდა, რომ პირიქით, სოც.მუშაკების რაოდენობა საკმარისიც კი არ იყო, არათუ, ვინმე გაეთავისუფლებინათ. კანონში შეტანილი ცვლილებებითაც სოც.მუშაკების რაოდენობის შემცირება არ განიხილებოდა, არამედ, პირიქით, რაოდენობის გაზრდა", — განაცხადა დავით ომსარაშვილმა.

როგორც ადვოკატი ამბობს, თბილისში სულ 7 სარჩელია შეტანილი და ყველა მათგანის საქმეს თავად ხელმძღვანელობს. ამ ეტაპისთვის მხოლოდ მაღრაძის სარჩელი განიხილეს, ხოლო დანარჩენების სასამართლო პროცესის ჩანიშვნას ელოდებიან.

"მიზეზი დაიდო რეორგანიზაცია. ვერ გავიგე, სიმართლე გითხრათ. ამბობდნენ, არ სჭირდებოდათ საკადრო ხალხი. რეალურად იყო ვაკანტური ადგილები სოციალურ სააგენტოშიც და ტრეფიკინგის სააგენტოშიც, მე რომც არ გავეშვი, მაინც იყო ადგილები, შტატის შემცირება არ მომხდარა. თავიდანვე ვამბობდი, რომ ლოგიკას არ ექვემდებარებოდა ეს ყველაფერი. ოქტომბრის თვეში ისეც სოციალურმა სააგენტომ შემომთავაზა სამსახური, ძალიან მჭირდებოდა და დავთანხმდი, თუმცა, მხოლოდ ერთი თვით დამიდო ხელშეკრულება, ახლა კიდევ ერთი თვით გამიხანგრძლივა. ჩემს პოზიციაზე არ ვმუშაობ, ველოდები საბოლოო შედეგს, რომ დავუბრუნდე ჩემს პროფესიას", — განაცხადა თეა მაღრაძემ.

თეას თქმით, თუ მოპასუხე მხარე გადაწყვეტილებას სააპელაციოში გაასაჩივრებს, ფსიქოლოგიურად მზად არის, რომ საქმეს ბოლომდე მიყვეს.