"მე დაჟინებით ვთხოვე პრეზიდენტ პუტინს, რომ უკრაინელ ჯარისკაცებს სიცოცხლე შეუნარჩუნოს", — ამის შესახებ სოციალურ ქსელში აშშ-ს პრეზიდენტი დონალდ ტრამპი წერს.

მისი თქმით, პროდუქტიული დისკუსია ჰქონდა რუსეთის პრეზიდენტ ვლადიმერ პუტინთან და "არის ძალიან დიდი შანსი, რომ ეს საშინელი, სისხლიანი ომი საბოლოოდ დასრულდეს".

"ჩვენ გვქონდა ძალიან კარგი და პროდუქტიული დისკუსია რუსეთის პრეზიდენტ ვლადიმერ პუტინთან გუშინ და არის ძალიან დიდი შანსი, რომ ეს საშინელი, სისხლიანი ომი საბოლოოდ დასრულდეს - მაგრამ, ამ მომენტში, ათასობით უკრაინის ჯარისკაცი მთლიანად გარშემორტყმულია რუსული სამხედროებით და არიან ძალიან ცუდ და დაუცველ პოზიციაში. მე დაჟინებით ვთხოვე პრეზიდენტ პუტინს, რომ მათ სიცოცხლე შეუნარჩუნოს. ეს იქნებოდა საშინელი ხოცვა-ჟლეტა, რომელიც არავის უნახავს მეორე მსოფლიო ომის შემდეგ. ღმერთმა დალოცოს ისინი ყველა!!!" — წერს ტრამპი.

11 მარტს საუდის არაბეთის ქალაქ ჯედაში გაიმართა მოლაპარაკებები კიევისა და ვაშინგტონის წარმომადგენლებს შორის. უკრაინულმა მხარემ მიიღო წინადადება 30-დღიანი ცეცხლის შეწყვეტის შესახებ, თუკი მას რუსეთი დათანხმდება. შეხვედრის შემდეგ შეერთებულმა შტატებმა გამოაცხადა იარაღის მიწოდების განახლება და დაზვერვის გაზიარების განახლება.

• აშშ-სა და უკრაინას შორის სამშვიდობო შეთანხმების შესახებ მოლაპარაკებები საუდის არაბეთში დღეს გაიმართება
• აშშ დაუყოვნებლივ განაახლებს უკრაინისათვის სადაზვერვო ინფორმაციის გაზიარებას — მოლაპარაკებების შედეგები ცნობილია

Reuters-ის ცნობით, რუსეთმა შეერთებულ შტატებს უკრაინის წინააღმდეგ ომის დასრულებისა და ვაშინგტონთან ურთიერთობების აღდგენის შესახებ შეთანხმების მოთხოვნების სია წარუდგინა და კრემლის ამჟამინდელი მოთხოვნები იმის მსგავსია, რაც რუსულმა მხარემ ადრე უკრაინას, შეერთებულ შტატებსა და NATO-ს წარუდგინა.

რუსეთის ადრინდელი მოთხოვნები მოიცავდა: უკრაინის NATO-ს წევრობაზე უარის თქმას, შეთანხმებას უკრაინაში უცხოური ჯარების არ განლაგების შესახებ და ყირიმისა და 4 უკრაინის რეგიონის საერთაშორისო აღიარებას რუსეთის შემადგენლობაში.

13 მარტს, რუსეთის ფედერაციის პრეზიდენტმა, ვლადიმერ პუტინმა ბელარუსის პრეზიდენტთან, ალექსანდ ლუკაშენკოსთან, ერთობლივი ბრიფინგი გამართა, რომელზეც განიხილეს აშშ-ისა და უკრაინის მიერ შემოთავაზებული ცეცხლის შეწყვეტის 30-დღიანი შეთანხმების პირობები. პუტინმა განაცხადა, რომ სამხედრო მოქმედებების დროებითი შეწყვეტის მომხრეა, თუ ამ პერიოდში "კონფლიქტის ძირეული მიზეზები აღმოიფხვრება".

"ვეთანხმებით ცეცხლის შეწყვეტის შესახებ წინადადებას, რათა მსხვერპლი შეწყდეს, მაგრამ იმ ფაქტიდან გამოვდივართ, რომ ამ ცეცხლის შეწყვეტამ ხანგრძლივ მშვიდობამდე უნდა მიგვიყვანოს და ამ კრიზისის ძირეული მიზეზები უნდა აღმოფხვრას", — განაცხადა პუტინმა.

პუტინმა არ გამორიცხა მორიგი სატელეფონო საუბარი დონალდ ტრამპთან, რადგან, მისი აზრით, არის ნიუანსები, რომლებიც დაზუსტებას საჭიროებს.

• ვლადიმერ პუტინი: თანახმა ვართ ცეცხლის შეწყვეტაზე, მაგრამ არსებობს ნიუანსები