დემნა გვასალია 13 მარტს Gucci-ს კრეატიულ დირექტორად დაინიშნა. 14 მარტის მონაცემებით, მას შემდეგ, Kerring-ის აქციების ფასი 12%-ით დაეცა. აქამდე დემნა ესპანურ Balenciaga-ს ხელმძღვანელობდა, რომელიც ასევე Kering-ის ჰოლდინგის საკუთრებაში მყოფი კომპანიაა.

მოდის სამყარო აქტიურად ადევნებდა თვალყურს Gucci-ს ირგვლივ არსებულ სიტუაციას მას შემდეგ, რაც მოდის სახლმა პოსტზე დაახლოებით 2-წლიანი სამსახურის შემდეგ იტალიელი საბატო დე სარნო დაითხოვა.

მიუხედავად იმისა, რომ ქუჩური სტილით ინსპირირებული ნამუშევრებით პოზიტიურად არის შეფასებული, ანალიტიკოსები დემნა გვასალიაზე გაკეთებულ არჩევანს მაინც რისკიანად თვლიან კომპანიის რეპუტაციის გათვალისწინებით.

J.P Morgan-ის ანალიტიკოსებმა მოდის სახლის ნაბიჯს "წინააღმდეგობრივი არჩევანი" უწოდეს და განაცხადეს, რომ ბრენდის კრეატიული მომავლის თავზე კითხვის ნიშანი მოსჩანს.

გასულ წელს, Gucci-ის გაყიდვებმა 21%-ით იკლო, წმინდა მოგება კი 51%-ით შემცირდა, რაც, უმეტესწილად, ჩინეთში შემცირებულ გაყიდვებს უკავშირდება.