მსახიობი ანა ამილახვარი ამბობს, რომ 2 თებერვალს, სპექტაკლში მაისურზე წარწერისთვის "თავისუფლება რეჟიმის ტყვეებს" რუსთაველის თეატრის სპექტაკლიდან "მიჯაჭვული პრომეთე" მოხსნეს.

"მე და ჩემმა მეგობრებმა გავაჟღერეთ, რომ სოლიდარულები ვართ სინდისის პატიმრების მიმართ. 6 თებერვალს გამოიცა დადგენილება, სადაც აგვიხსნეს, რომ აღარ ვართ მოქმედის სპექტაკლის მონაწილეები და ასევე გვაქვს მოცემული შენიშვნა. რაც ნიშნავს იმას, რომ შემდეგ ნებისმიერ შენიშვნაზე, არ ვიცი, ახლა რომ ინტერვიუს გაძლევთ, შეიძლება ესეც გახდეს მიზეზი შენიშვნის და მომხსნან საერთოდ თეატრიდან", — ამბობს ანა ამილახვარი "ტვ პირველთან".

რუსთაველის დასის გამგე, დავით უფლისაშვილის თქმით, მსახიობის სპექტაკლიდან მოხსნის შესახებ გადაწყვეტილება თეატრის სამხატვრო ხელმძღვანელმა რობერტ სტურუამ და მთავარმა რეჟისორმა დათო საყვარელიძემ მიიღეს.

"იცით რაც მოხდა თეატრში. გადაწყვეტილება სამხატვრო ხელმძღვანელმა და მთავარმა რეჟისორმა — ბატონმა რობერტმა [სტურუამ] და დათო საყვარელიძემ მიიღეს. ჩვენ გვაქვს შინაგანაწესი, კანონი. როცა მსახიობები თავის დაკვრას აკეთებენ, ამ დროს არ შეიძლება სხვა კოსტიუმი და სხვა რამე შემოიტანო თეატრის სცენაზე", — ამბობს უფლისაშვილი.

ჟურნალისტის კითხვაზე — "ანუ მსახიობს საკუთარი აზრის სცენიდან გამოთქმა არ შეუძლია?"

უფლისაშვილი პასუხობს, რომ "არა, არ შეუძლია".