აშშ-ში, ნიუ-იორკის შტატში, ველური ბუნების დამცველებმა ერთი ციცქნა ჩრდილოამერიკული ფეხბუმბულიანი ბუკიოტი გადაარჩინეს მას შემდეგ, რაც ის როკფელერის ცენტრის საშობაო ნაძვის ხის ტრანსპორტირებისას მუშებმა იპოვეს. ნაძვი ონეონტადან ნიუ-იორკში 273 კმ-ის მანძილზე გადაჰქონდათ.

"ეს ფილმიდან გადმოსულ ამბავს ჰგავს", — თქვა რეივენსბერდის ველური ბუნების ცენტრის ხელმძღვანელმა ელენ კალიშმა, რომელიც ახლა ბუს უვლის.

ბუმბულებიანი უბილეთო მგზავრი — რომელსაც ახლა უკვე როკფელერი დაარქვეს — ჩამოსვეს და ველური ბუნების დაცვის ცენტრში წაიყვანეს. კალიშის გუნდმა მას სითხე და "იმდენი თაგვი მისცა, რამდენის შეჭმასაც მოახერხებდა". საბრალო ბუს გზაში 3-დღიანი მოგზაურობის დროს საჭმელი და სასმელი საერთოდ არ ჰქონია.

ოთხშაბათს ღამით, 18 ნოემბერს, როკფელერი სამედიცინო შემოწმებაზე მიიყვანეს და რენტგენი გადაუღეს, თუმცა კალიში ამბობს, რომ ამხელა მოგზაურობის გათვალისწინებით ის შესანიშნავ ფორმაშია.

"ჯერჯერობით ბუ ნაღვლიანი და ფრთხილია. ძალიან ფხიზელი, ნათელი თვალები აქვს. წარმოუდგენლად საყვარელია", — თქვა კალიშმა.

ფოტო: Ravensbeard Wildlife Center

როკფელერის პაწაწინა ზომის მიუხედავად, ის ზრდასრულია. ფეხბუმბულიანი ბუკიოტები აშშ-ის ჩრდილო-აღმოსავლეთის ყველაზე პატარა ბუები არიან და, კალიშის თქმით, როგორც წესი, 17-21 სმ-მდე იზრდებიან.

"ძალიან საინტერესო სახეობაა", — თქვა კალიშმა. ისინი "უკიდურესად" ღამის ფრინველები არიან, რაც ნიშნავს, რომ მათ, ჩვეულებრივ, ვერსად ნახავთ, თუ განზრახ არ დაუწყებთ ძებნას. ზოგი მათგანი ზამთრისთვის სამხრეთისკენ მიემართება, ზოგი კი საერთოდ არ მიგრირებს.

როგორც კი როკფელერი გამოჯანმრთელდება, კალიში და რეივენსბერდის გუნდი მას ველურ ბუნებაში გაუშვებს. "ჩვენი მიზანია, [ბუნებაში] გავუშვათ ყველა ფრინველი, რომლის გაშვებაც შესაძლებელია", — განაცხადა მან.

კალიშის თქმით, აშშ-ში დაახლოებით ორი მილიონი ფეხბუმბულიანი ბუკიოტი გვხვდება, ამიტომ როკფელერმა მთლად ონეონტაში დაბრუნება რომც ვერ მოახერხოს, ის მაინც კარგად იქნება. "ისინი ყოველ წელს ახალ პარტნიორს პოულობენ და ცხოვრებას აგრძელებენ", — თქვა მან.

2020-ის ყველა ცუდი ამბის გათვალისწინებით, ციცქნა ბუს გადარჩენა "ის ამბავია, რომლის გაზიარებაც საჭირო იყო".