ცენტრალურ საარჩევნო კომისიაში აცხადებენ, რომ საპარლამენტო არჩევნების მეორე ტურისთვის, 4 095 ამომრჩევლისგან შემდგარი სპეციალური სია უკვე დაამტკიცეს. ასევე, შექმნილია 80 სპეციალური საარჩევნო უბანი საავადმყოფოებსა და იზოლაციაში მყოფი ამომრჩევლებისთვის, რომლებსაც 145 გადასატანი საარჩევნო გადასატანი ყუთი მოემსახურება.

ცესკოს ინფორმაციით, გადასატანი საარჩევნო ყუთის მოთხოვნით 2 360-მა მოქალაქემ მომართა, რომლებიც აცხადებენ, რომ არიან თვითიზოლაციაში, თუმცა, მათგან მხოლოდ 985 ამომრჩევლის მოთხოვნა დაკმაყოფილდა.

"მეორე ტურში მონაწილეობის მიზნით, გადასატანი ყუთის მოთხოვნა თვითიზოლაციაში მყოფ იმ ამომრჩევლებს შეეძლოთ, რომლებიც შესაბამისი უწყების მონაცემთა ბაზაში ფიქსირდებიან და ტერიტორიულად იმყოფებიან იმ მაჟორიტარული საარჩევნო ოლქის საზღვრებში, სადაც არიან რეგისტრირებული", — განმარტავენ ცესკოში.

თვითიზოლაციაში მყოფ ამომრჩევლებს სატელეფონო-საინფორმაციო ცენტრში დარეკვის და გადასატანი ყუთის მოთხოვნის შესაძლებლობა 15-17 ნოემბერს ჰქონდათ. ცესკოში ამბობენ, რომ აღნიშნულ ბაზაში რეგისტრირებულ 15 647 ამომრჩეველს, რომელთაც მითითებული ჰქონდათ საკონტაქტო ინფორმაცია, გაუგზავნეს შეტყობინებები და მოუწოდეს მოეთხოვათ გადასატანი საარჩევნო ყუთი, საავადმყოფოებსა და კარანტინში მყოფებს კი დაურიგეს შესაბამისი საინფორმაციო ბარათები.

საარჩევნო კომისიაში განმარტავენ, თვითიზოლაციაში მყოფი ამომრჩევლები მეორე ტურში მონაწილეობის გადასატანი ყუთით შესაძლებლობის შესახებ ინფორმაციას არჩევნებამდე ერთი დღით ადრე, 20 ნოემბერს მიიღებენ.

31 ოქტომბრის საპარლამენტო არჩევნების მეორე ტური 21 ნოემბერს ჩატარდება, თუმცა, ოპოზიციონერი კანდიდატები მასში მონაწილეობას არ აპირებენ. ბარიერგადალახულმა რვავე ოპოზიციურმა პარტიამ საპარლამენტო მანდატებზე უარი თქვა. ისინი ცესკოს მიერ გამოქვეყნებულ შედეგებს არ აღიარებენ და ხელახალი არჩევნების ჩატარებას მოითხოვენ.

გაიგეთ მეტი: