ლელოს ოფისში ოპიზიციაა არჩევნების მეორე ტურის პარალელურად აქციის ფორმას გეგმავს. ლელოს ერთ-ერთი ლიდერის, საბა ბუაძის თქმით, პროტესტი მოიცავს ყველა შესაძლო ფორმას, რომელიც კანონის ფარგლებშია. თუმცა, ბუაძე ამბობს, რომ ლელოს პოზიციაა საარჩევნო უბნებთან სირცხვილის დერეფნების არ მოეწყოს.

"აქციის ფორმაზე ჯერ არ შევთანხმებულვართ. სირცხვილის დერეფნები საარჩევნო უბნებთან, ლელოსთან ერთიანი ოპოზიციის ფორმატში ვერ მოეწყობა. თუ ვინმე ამას ინდივიდუალურად გააკეთებს, ეს მათი გადასაწყვეტია. ჩვენ ვეწინააღმდეგებით პროტესტის ასეთ ფორმას, რადგან მიგვაჩნია არაპროდუქტიულად და არაკონსტრუქციულად. განიხილება ბევრი სხვადასხვა ვერსია, მათ შორის ცოცხალი ჯაჭვის ორგანიზება", — ამბობს საბა ბუაძე.

საქართველოში საპარლამენტო არჩევნების მეორე ტური 21 ნოემბერსაა დანიშნული. ოპოზიცია მასში არ მონაწილეობს, რადგან 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. რიგგარეშე არჩევნების მოთხოვნით, ოპოზიციის წარმომადგენლები საპროტესტო აქციებს მართავენ.

15 ნოემბერს ბათუმში გამართულ საპროტესტო აქციაზე ნაციონალური მოძრაობის წევრმა, ლევან ვარშალომიძემ მხარდამჭერებს მოუწოდა, რომ 21 ნოემბერს საარჩევნო უბნებთან სირცხვილის დერეფნები გააკეთონ. მისი ეს პოზიცია გააკრიტიკეს პარტიის ლიდერებმა, ხატია დეკანოიძემ და სალომე სამადაშვილმა. ამ იდეას არ იზიარებენ არც ოპოზიციურ ერთობაში შემავალი სხვა პარტიები.