მმართველი გუნდიდან წამოსული დეპუტატის, თამარ ჩუგოშვილის განცხადებით, თუ ოპოზიცია პარლამენტში არ შევა და ერთპარტიული პარლამენტი შეიკრიბება, ისინი შედეგს ვერ მიაღწევენ. მისი თქმით, ერთპარტიული პარლამენტის გამოცდილება ქვეყანას 2008 წელს ჰქონდა და ეს "კატასტროფა იყო".

ჩუგოშვილი ამბობს, რომ მეორე ტურში მონაწილეობის არმიღებით ოპოზიციამ მმართველ გუნდს უამრავი მანდატი დაუთმო და ესეც არ იყო სწორი გადაწყვეტილება. TV პირველის წამყვანის კითხვაზე, ამ შემადგენლობის ცესკოსა და სასამართლოს პირობებშიც უნდა გააგრძელოს თუ არა ოპოზიციამ არჩევნებისთვის ბრძოლა, ჩუგოშვილი პასუხობს:

"მაშინ უნდა ვთქვათ, რომ, უბრალოდ, აღარ ვემორჩილებით ჩვენ ამ სახელმწიფო ინსტიტუტებს. მაშინ აქამდე მივდივართ, რომ ანარქია გამოვაცხადოთ და ვთქვათ, რომ არც პოლიციას ვემორჩილებით, იმიტომ, რომ არ მოგვწონს, არც პროკურატურას, არც სასამართლოს და ზოგადად ანარქია გამოვაცხადოთ მაშინ ხომ. გასაგებია, რომ არ მოგვწონს არც ამ ცესკოს ჩატარებული არჩევნები, უამრავი ხარვეზია და ამაზე ვლაპარაკობთ ყველა, მაგრამ ანარქიაში ხომ ვერ შევალთ არა?"

ოპოზიცია 31 ოქტომბრის არჩევნების ლეგიტიმურობას არ აღიარებს და ხელახალ არჩევნებს ითხოვს. მმართველ გუნდში კი აცხადებენ, რომ ეს საკითხი არ განიხილება. ფასილიტატორი ელჩების ჩართულობით მმართველმა გუნდმა და ოპოზიციამ მოლაპარაკებები დაიწყეს. ამ ეტაპზე 2 შეხვედრა ჩატარდა და ორივე მხარე აცხადებს, რომ პოზიციები უცვლელია.