თეთრი სახლის ყველაზე გახმაურებული სკანდალის შემდეგ 20 წელზე მეტი გავიდა, თუმცა ბილ კლინტონისა და მონიკა ლევინსკის რომანის დეტალები დროდადრო ისევ ჩნდება მედიაში.

როცა აკრძალული რომანის შესახებ ყველამ შეიტყო, მონიკა ლევინსკიმ 1995 წელს სასამართლოზე საკუთარი კაბა წარადგინა. მონიკამ აღნიშნა, რომ სამოსი მას სტაჟირების პერიოდში ეცვა და მასზე ბილ კლინტონის სპერმა იყო, რაც დნმ–ის ანალიზით დადასტურდა კიდეც. თუმცა საბოლოოდ, აშშ-ის 42-ე პრეზიდენტი არც მისმა გუნდმა გაწირა, არც ჰილარი კლინტონმა და არც ამერიკელმა ხალხმა.

მონიკა ლევინსკი კი ყველამ შეიძულა, საზოგადოებიდან გარიყეს და დასცინოდნენ კიდეც.

სკანდალური რომანის ისტორია FX-ის ერთ-ერთი ყველაზე წარმატებული და პოპულარული სერიალის, ამერიკული კრიმინალური ისტორიის თემა გახდება. შოუს ავტორი ამერიკული საშინელებათა ისტორიის შემქმნელი რაიან მერფია.

სერიალის პირველი სეზონი ამერიკელი სპორტსმენის, ო. ჯეი. სიმფსონის ცოლისა და ბოიფრენდის მკვლელობას ეხებოდა, მეორე სეზონი ქარიშხალ "კატრინას" შესახებ იქნება, რომელმაც 2005 წელს 2000 ადამიანის სიცოცხლე იმსხვერპლა, მესამე სეზონის თემა კი დონატელა ვერსაჩეს ძმის, ჯანი ვერსაჩეს მკვლელობა გახდება, სადაც დონატელას როლს ლედი გაგა შეასრულებს.