ევროპული საქართველოს ერთ-ერთი ლიდერი, გიგა ბოკერია, ქართული ოცნების აღმასულებელი მდივნის, ირაკლი კობახიძის მიერ ოპოზიციის დებატებში გამოწვევას გამოეხმაურა და აღნიშნა, რომ ევროპული საქართველო მზად არის დებატებისთვის, თუმცა საჭიროა ოპოზიციის სხვა წარმომადგენლებთან კონსულტაციაც. ამის შესახებ მან რუსთავი 2-თან განაცხადა.

"მიუხედავად იმისა, რომ ივანიშვილის პოლიტიკურ კლოუნებთან, მდინარაძესთან, კობახიძესთან დებატები ამ კრიზისს ვერ განმუხტავს, ამ კრიზისს განმუხტავს მხოლოდ ახალი არჩევნები, ევროპული საქართველო, ჩვენი გუნდი ყოველთვის მზად ვართ ივანიშვილის გარემოცვასთან დებატებისთვის. მთელი ამ წლების განმავლობაში პარლამენტში ამას ვაკეთებდით დ ყველა ხედავდა შედეგებს ამ დებატების, ამიტომ მზად ვართ, რა თქმა უნდა. მარტო ჩვენ არა ვართ ოპოზიციაში და კოლეგებთან გვექნება კონსულტაცია, ისინი როგორ უყურებენ ამ საკითხს. კიდევ ერთი თემა, რაც არის ნიშანდობლივი ფაქტორი, არის ის, რომ დებატები ნორმალური იყო წინასაარჩევნო პერიოდში, როცა ყველა დებატს გაექცნენ და პროსამთავრობო არხებზეც კი არ დადიოდნენ დებატებში ოპოზიციასთან", — ამბობს ბოკერია.

ირაკლი კობახიძემ ოპოზიციას სატელევიზიო დებატები შესთავაზა. მან რუსთავი 2-ის ეთერში განაცხადა, რომ მზადაა ისეთ ფორმატში მონაწილეობისთვის, სადაც ოპოზიციას დაუპირისპირდება მმართველი გუნდი, განსახილველი თემები კი იქნება საარჩევნო დარღვევები, ხარვეზები და მანიპულაცია.