საქართველოს საგარეო საქმეთა მინისტრმა მიხეილ ჯანელიძემ თურქულ გამოცემა ანადოლუსთან მიცემულ ინტერვიუში ისაუბრა საქართველოში რუსეთის მიერ ოკუპირებულ ტერიტორიებზე, საქართველო-თურქეთის პარტნიორულ ურთიერთობებზე და საქართველოს ნატოში გასაწევრიანებლად თურქეთის როლზე.

"რუსეთი პატივს არ სცემს საქართველოს სუვერენულ არჩევანს და აბრკოლებს მის დასავლურ მისწრაფებებს. მოსკოვმა ეფექტიანად გამოიყენა აფხაზეთისა და ცხინვალის რეგიონები საქართველოს წინააღმდეგ ამ მიზნის მისაღწევად" - აცხადებს ჯანელიძე.

მიხეილ ჯანელიძეს განცხადებით, რუსეთის მიმართ კონსტრუქციული პოლიტიკის მიუხედავად რუსეთის ფედერაციას დღემდე ოკუპირებული აქვს საქართველოს ტერიტორიების 20 პროცენტი.

მინისტრის თქმით, ერთადერთ საერთაშორისო მექანიზმს ევროკავშირის სადამკვირვებლო მისია (EUMM) წარმოადგენს, რომელსაც საქართველოს ოკუპირებულ ტერიტორიებზე შესვლის უფლება არ ეძლევა, რათა ადგილზე მოახდინოს არსებული ვითარების მონიტორინგი:

"რუსეთს გაფორმებული აქვს ე.წ. ხელშეკრულებები ოკუპირებულ ტერიტორიებთან, მათ შორისაა "ინტეგრაციის ხელშეკრულება" და "მემორანდუმები". მიუხედავად იმისა, რომ საერთაშორისო კანონმდებლობის მიხედვით, ეს დოკუმენტები არალეგიტიმურია, ოკუპირებულ ტერიტორიებზე ვრცელდება რუსეთის სამხედრო, ეკონომიკური და სოციალური სისტემები".

მინისტრი დასძენს, რომ ოკუპირებულ რეგიონებში მცხოვრებ მოსახლეობას ისეთი ბაზისური უფლებები აქვთ შეზღუდული, როგორიცაა გადაადგილების, ქონების დაგროვების და მშობლიურ ენაზე განათლების მიღების უფლება.

საქართველო-თურქეთის პარტნიორულ ურთიერთობებზე საუბრისას, მიხეილ ჯანელიძემ აღნიშნა, რომ ორ ქვეყანას შორის მჭიდრო ურთიერთობები არსებობს პოლიტიკური, ეკონომიკური, უსაფრთხოების, კულტურისა და სხვა მრავალი მიმართულებით და ამ კუთხით თანამშრომლობა სისტემატიურად ღრმავდება:

"საქართველო თურქეთს შორის ურთიერთობები რეგიონში სამაგალითოა".

ინტერვიუში მიხეილ ჯანელიძემ აგრეთვე საქართველოს ევროპულ და ევრო-ატლანტიკურ მისწრაფებებზე ისაუბრა და განაცხადა, რომ თურქეთს მნიშვნელოვანი წვლილი შეაქვს ნატო-საქართველოს არსებითი პაკეტის ელემენტების იმპლემენტაციის პროცესში.