თურქეთის პოლიციამ ფართომასშტაბიანი ძებნის შემდეგ, ახალი წლის ღამეს, კლუბ რეინაზე თავდასხმაში ბრალდებული დააკავა. აბდულკადივ მაშარიფოვს ბრალად ედება 39 ადამიანის მკვლელობა. იგი სტამბოლის ერთ-ერთ უბანში დააკავეს.

BBC თურქულ მედიაზე დაყრდნობით წერს, რომ პოლიციამ იგი ოთხი წლის შვილთან ერთად იპოვა მეგობრის სახლში. იმავე გამოცემის ცნობით, დაკავებულია ასევე მისი მეგობარი და თანმხლები სამი ქალი.

Hurriyet წერს, რომ დაკავებულებმა ჯერ სამედიცინო შემოწმება უნდა გაიარონ და შემდეგ გადაიყვანენ პოლიციის განყოფილებაში.

უზბეკი ეროვნების მაშარიფოვიის მიერ მოწყობილ ტერაქტზე პასუხისმგებლობა ე.წ. ისლამურმა სახელმწიფომ აიღო. დაჯგუფების განცხადებით, ეს იყო შურისძიება, თურქი სამხედროების ჩართვისთვის სირიის ომში.

ახალი წლის ღამეს, სტამბოლში, ღამის კლუბ რეინაში მომხდარი ტერაქტის მოწყობაში ბრალდებული თურქეთში სირიიდან ჩავიდა. 1 იანვარს, თურქეთის დროით, 01:30 საათზე, შეიარაღებულმა პირმა კლუბში მყოფებს ცეცხლი გაუხსნა, რის შედეგადაც 39 ადამიანი დაიღუპა.