საპატრულო პოლიციის დეპარტამენტის უფროსის, ვაჟა სირაძის თქმით, აქციის მონაწილეებს გასათბობლად მომარაგებული შეშა იმიტომ არ შეატანინეს პარლამენტის მიმდებარე ტერიტორიაზე, რომ ის არ გამოიყენონ პოლიციის წინააღმდეგ.

"არაერთი გამოცდილება გვაქვს თითოეულ პოლიციელს, რომ არაერთხელ, შეშა გამოყენებულ იქნა ძალადობის საგნად, იმისთვის, რომ დაეზიანებინათ პოლიციელები. დაანთეს პარლამენტის წინ ცეცხლი, რითიც შეიძლება საფრთხე შეექმნას როგორც აქციის მონაწილეების, ისე პოლიციელების სიცოცხლეს", — განაცხადა მან.

მისივე თქმით, შეკრებისა და მანიფესტაციის შესახებ კანონში ძალიან ნათლად წერია, რომ პოლიციას უფლება აქვს, შეზღუდოს იმ ნივთის შეტანა, რომელიც შეიძლება გამოყენებულ იქნას პოლიციელის თუ ნებისმიერი მოქალაქის საწინააღმდეგოდ, რომელიც დააზიანებს ადამიანის სიცოცხლეს და ჯანმრთელობას.

ამასთან, ვაჟა სირაძემ დაადასტურა, რომ დაკავებულს შორის არის ლექსო მაჭავარიანიც. სირაძის თქმით, მან შეურაცხმყოფელი სიტყვები გამოიყენა პოლიციელების მიმართ.

"პირადად მე, არაერთხელ განვუმარტე ის, რაც მოგახსენეთ, ასევე, პოლიციელები მოუწოდებდნენ მას, რომ დამორჩილებოდა პოლიციის კანონიერ მოთხოვნას. მან საჯაროდ განაცხადა, რომ არ დაემორჩილება პოლიციელის კანონიერ მოთხოვნას და ასევე, შეურაცხმყოფელი სიტყვები გამოიყენა ჩვენს მიმართ. შესაბამისად, ის დაკავებულია ადმინისტრაციული წესით", — განაცხადა სირაძემ.