8 ნოემბერს, ცესკოსთან აქციის წყლის ჭავლით დაშლის დროს დაშავებული მოქალაქეების უმრავლესობა საავადმყოფოებიდან გაწერეს. კავკასიის მედიცინის ცენტრში On.ge-უთხრეს, რომ გვიან ღამით მათთან აქციაზე დაშავებული 14 მოქალაქე შეიყვანეს, აქედან 11 სამართალდამცავი იყო, 3 სამოქალაქო პირი. დაშავებულებიდან 13 ადამიანი უკვე გაწერეს. ერთს კი თვალზე ოპერაცია ჩაუტარდა.

"აქციის დაშლისას 21 წლის კაცს თვალის ლორწოვანი გარსი დაუზიანდა. მისი ჯანმრთელობის მდგომარეობა სტაბილურია და ალბათ, მალე გავწერთ", — განმარტავენ კავკასიის მედიცინის ცენტრში.

ნიუ ჰოსპიტალში აცხადებენ, რომ წუხელ შეყვანილი ორივე პაციენტი სახლში უკვე გაწერეს. ერთს თვალი ჰქონდა დაზიანებული, მეორეს — ფეხი. კლინიკის ცნობით, ორივეს გადადუდებელი დახმარება გაეწია და ბინაზე აგრძელებენ მკურნალობას.

ღუდუშაურის სახელობის კლინიკაში 7 დაშავებული შეიყვანეს. აქედან ამ დროისათვის გაწერილია 6. კლინიკაში აცხადებენ, რომ მათ სხვადასხვა სახის მსუბუქი დაზიანება აღენიშნებოდათ და რომ საავადმყოფოში დარჩენილი პაციენტის გაწერაც მალე იგეგმება.

აქციაზე წყლის ჭავლის გამოყენების დროს დაშავდნენ ჟურნალისტებიც. მათ სხვადასხვა სახის დაზიანება მიიღეს და დაუზიანდათ ტექნიკაც.

8 ნოემბერს ოპოზიციამ პარლამენტთან საპროტესტო აქცია გამართა, რომელზეც მთავრობას სამი მოთხოვნა წამოუყენა და დრო რვა საათამდე მისცა. ისინი ხელახალ არჩევნებს, ცესკოს თავმჯდომარის გადადგომას და პოლიტპატიმრების გათავისუფლებას ითხოვდნენ. ულტიმატუმის ვადის ამოწურვის შემდეგ ნიკა მელიამ განაცხადა, რომ მათთან კონტაქტზე მყოფმა ირაკლი კობახიძემ და არჩილ თალაკვაძემ ხვალ შეხვედრა შესთავაზეს, რასაც არ დათანხმდებოდნენ. ეს კობახიძემ უარყო და ამტკიცებდა, რომ შეხვედრა ოპოზიციამ მათ შესთავაზა და ამას მხოლოდ პარტნიორების სურვილის შემთხვევაში დათანხმდებოდნენ.

რვა საათის შემდეგ ოპოზიციამ განაცხადა, რომ ცესკოსთან გადაინაცვლებდნენ და არავის მისცემდნენ შიგნით შესვლის ან იქედან გამოსვლის უფლებას. სანამ ოპოზიცია მსვლელობით მივიდოდა, ცესკოსთან რამდენიმე ადამიანი შეიკრიბა. ადგილზე მობილიზებული იყო პოლიცია, რომელთა რაოდენობამ იზრდებოდა. ცესკოსთან მოხდა რამდენიმე დაპირისპირებაც, თუმცა მალევე აღმოიფხვრა.

ამის შემდეგ კი ადგილზე სპეცრაზმი გამოჩნდა, რომელმაც გაფრთხილების გარეშე დაიწყო წყლის ჭავლის გამოყენება აქციის მონაწილეების წინააღდეგ. აქციაზე გაუშვეს სავარაუდოდ ცრემლსადენი გაზიც, თუმცა შსს ამას უარყოფს. რაც შეეხება წყლის ჭავლს, ამას პროპორციულ ძალად მიიჩნევს. ამ ეტაპზე არსებული ინფორმაციით, აქციის დაშლისას 2 ადამიანი დაშავდა.

უფლებადამცველები, ყოფილი და მოქმედი სახალხო დამცველები კი აცხადებენ, რომ აქციის დაშლა ამ მეთოდით არაკანონიერი იყო და არღვევდა გამოხატვის თავისუფლებას. მათივე თქმით, ეს იყო სასტიკი და არაპროპორციული ძალა.

გაიგეთ მეტი მომხდარის პოლიტიკურ შეფასებებზე:

არ არის დრო პოლიტიკური ძალის დემონსტრირების — ლომჯარია