როგორც ამბობენ, შურისძიება ის კერძია, რომელიც ცივად უნდა მიირთვა. გარემოს დაცვის თინეიჯერმა აქტივისტმა გრეტა თუნბერგმა, რომელსაც ჟურნალ Time-ის წლის პიროვნებად დასახელების შემდეგ დონალდ ტრამპმა ტვიტში დასცინა, ზუსტად 11 თვე იცადა, სანამ აშშ-ის პრეზიდენტს იდეალურ საპასუხო დარტყმას მიაყენებდა.

2019 წლის დეკემბერში ტრამპმა 17 წლის თუნბერგს უთხრა, რომ "ბრაზის მართვის პრობლემა" მოეგვარებინა და "მეგობართან ერთად ძველებური ფილმის სანახავად წასულიყო".

"დამშვიდდი, გრეტა, დამშვიდდი!" — დაწერა ტრამპმა ტვიტში, რომელიც იმით დაიწყო, რომ Time-ის მიერ აქტივისტისთვის მინიჭებულ ჯილდოს "სრული აბსურდი" უწოდა.

ხუთშაბათს, 5 ნოემბერს, ტრამპი ტვიტერზე ერთ ამბებში იყო და ხმების გაყალბების შესახებ უსაფუძვლო ბრალდებებს ისროდა, თუნბერგმა კი მას მისივე სიტყვები დაუბრუნა.

"სრული აბსურდია", — უპასუხა თუნბერგმა ტრამპის ტვიტს, რომელშიც ის ხმების დათვლის შეწყვეტას მოითხოვდა. "დონალდმა თავის ბრაზის მართვის პრობლემაზე უნდა იმუშაოს, შემდეგ კი მეგობართან ერთად ძველებური ფილმის სანახავად წავიდეს! დამშვიდდი, დონალდ, დამშვიდდი!"

დაპოსტვიდან ორ საათში ტვიტს უკვე 452 000-ზე მეტი მოწონება ჰქონდა — ორჯერ უფრო მეტი, ვიდრე ტრამპის ორიგინალ მესიჯს — 15 საათის შემდეგ კი ეს რიცხვი უკვე 1.4 მილიონზე მეტია.