აშშ-ს პრეზიდენტის, დონალდ ტრამპის საარჩევნო კამპანია მოითხოვს, რომ უისკონსინის შტატში ხმები გადაითვალონ. ამ შტატში ჯო ბაიდენი, რომელიც ტრამპს 20 ათასი ხმით უსწრებს, უკვე გამოცხადდა წინასწარ გამარჯვებულად. თუმცა უნდა აღინიშნოს, რომ ხმების გადათვლაზე კამპანიის წარმომადგენლები ჯერ კიდევ გამარჯვებულის გამოვლენამდე საუბრობდნენ.

"რამდენიმე ოლქიდან დარღვევების შესახებ ინფორმაცია შემოვიდა, რაც შედეგების ვალიდურობის კუთხით სერიოზულ ეჭვებს ბადებს", — განაცხადა კამპანიის ხელმძღვანელმა, ბილ სტეპიენმა.

მიუხედავად იმისა, რომ ტრამპი არჩევნების ფალსიფიკაციაზე საუბრობს, არც მას და არც მის წარმომადგენლებს რაიმე მტკიცებულება არ წარმოუდგენიათ.

უისკონსინის ყოფილი გუბერნატორის, სკოტ ვოკერის თქმით, კანდიდატებს შორის იმდენად დიდი სხვაობაა, რომ ხმების გადათვლა რადიკალურ ცვლილებას ვერ მოიტანს.

აშშ არჩევნებთან დაკავშირებულ სიახლეებს LIVE რეჟიმში გაეცანით აქ. ასევე, ადევნეთ თვალი On.ge-ს ინტერაქტიულ რუკას.