პარლამენტის თავმჯდომარის, არჩილ თალაკვაძის განცხადებით, საერთაშორისო თანამეგობრობა არჩევნების ლეგიტიმურობას აღიარებს და უარზე მხოლოდ "რადიკალური ოპოზიციაა". მისი თქმით, ნაციონალური მოძრაობა არჩევნების დემოკრატიულობას არ აღიარებს იქამდე, სანამ თავად არ გაიმარჯვებენ.

"ჩვენ დღეს გვყავს რადიკალური ოპოზიცია, ნაციონალური მოძრაობა, რომლის მთავარი ლოზუნგი არის ის, რომ არჩევნებში სანამ ჩვენ არ გავიმარჯვებთ, მანამ ის არ არის დემოკრატიული. ეს არის მათი პრეზუმცია", — განაცხადა თალაკვაძემ.

თალაკვაძე და ქართული ოცნების სხვა ლიდერები ეუთო/ოდირის დამკვირვებლებს შეხვდნენ და საარჩევნო პროცესი განიხილეს. შეხვედრა საპროტესტო აქციის ფონზე წარიმართა. ოპოზიციის მხარდამჭერები და აქტივისტები აცხადებდნენ, რომ არჩევნები გაყალბებულია.

ბარიერგადალახულმა რვავე ოპოზიციურმა პარტიამ არჩევნების შედეგები ლეგიტიმურად არ აღიარა და პარლამენტის მანდატებზე უარი თქვა, მაჟორიტარმა კანდიდატებმა კი მეორე ტურში მონაწილეობა გადაიფიქრეს.