ავსტრალიაში, ბრისბეინში, სახლში ღამით გაჩენილ ხანძარს ბიჭი მას შემდეგ გადაურჩა, რაც მისმა თუთიყუშმა განგაშის ზარი ატეხა მანამ, სანამ კვამლის დეტექტორები ამუშავდებოდა.

სახლი უკვე მთლიანად ცეცხლის ალში იყო გახვეული, როდესაც მეხანძრეები ღამის 02:00 საათზე მოვიდნენ.

სახლში მცხოვრებმა ანტონ ნუიენმა განაცხადა, რომ ძალიან გაუმართლა, რომ უვნებლად დააღწია ხანძარს თავი, რაც მისი თუთიყუშის, ერიკის, დამსახურებაა, რომელმაც განგაში დროულად ატეხა.

"ძლიერი დარტყმის ხმა გავიდე და ერიკმა — ჩემმა თუთიყუშმა — ყვირილი დაიწყო, რაზეც გამეღვიძა და კვამლის სუნი მეცა. ერიკი ხელში ავიყვანე, კარი გავაღე და სახლს რომ შევხედე, იქ ცეცხლი იყო. ზურგზე მოვიგდე ჩანთა და ეგრევე ქვემოთ ჩავირბინე", — თქვა მან.

ფოტო: ABC News

მისი თქმით, მას არ გაუგია, რომ კვამლის დეტექტორებს განგაშის სიგნალი მიეცათ.

"შოკში ვარ, თუმცა კარგად ვარ. ყველაფერი კარგადაა, სანამ საკუთარი თავი და ჩემი ჩიტი მყავს", — თქვა ანტონმა.

სახანძრო დეპარტამენტის ინსპექტორმა კემ ტომასმა თქვა, რომ საფრთხის შესახებ ბატონი ნუიენის გასაფრთხილებლად თუთიყუში მის სახელს ყვიროდა: "ანტონ! ანტონ!"

"სახლში კვამლის დეტექტორებიც იყო, თუმცა ჩიტმა პატრონი ჯერ კიდევ მათი სიგნალის ჩართვამდე გააღვიძა", — თქვა ინსპექტორმა.

ტომასის თქმით, სახანძრო სამსახურმა დროულად მოახერხა ხანძრის ჩაქრობა და ის სხვა სახლებზე არ გავრცელებულა. ხანძრის გაჩენის მიზეზი ჯერ დადგენილი არ არის.