ნაციონალური მოძრაობის წევრი, ნიკა მელია აცხადებს, რომ იგი სამაჯურს ხელზე მაინც არ გაიკეთებს. ასე გამოეხმაურა იგი პროკურატურის განცხადებას. უწყება ელექტრო სამაჯურის მოხსნის გამო მელიასთვის 100 000-ლარიან გირაოს და საზღვრის კვეთის შეზღუდვას ითხოვს

"ყველაფერი, რასაც ქართული ოცნება გააკეთებს, თავისივე საზიანო იქნება. ძალიან მჯერა ამისი, იმიტომ, რომ ერთი პოლიტიკურად გაკოტრებული გუნდია, მეორე, სიმართლე მათ მხარეს საერთოდ არ არის. გუნდი, რომელიც ვითომ არჩევნებს ატარებს, იარაღის ძალადობრივი მუქარების სხვადასხვა საარჩევნო უბნის დარბევით და მიაჩნია, რომ ეს ასე უნდა ყოფილიყო და პროტესტი არავის არ უნდა გამოეთქვა, აბსოლუტურად მეასე და მეორასე ხარისხოვანია, ჩემს ხელზე ეს სამაჯური იქნებოდა თუ არ იქნებოდა, წესით და რიგით. ეს არ არის სამართლებირივი სახელმწიფო. სამაჯური გიკეთია, ან არ გიკეთია ხელზე. მაგრამ ამ ადამიანებს, როგორც ჩანს, აინტერესებთ ეს ელექტროსამაჯური ხელზე მიკეთია თუ არ მიკეთია. მე ამ სამაჯურს ხელზე არ გავიკეთებ, ვთქვი და ასეც იქნება. დანარჩენი თავის თავს დააბრალოს ივანიშვილმა. იმიტომ, რომ ამ ბატონს თავს არ დაუხრის აღარავინ და იგი ამ ქვეყანას ვერ მოხუფავს და ვერ დააკონსერვებს. ამ ქვეყნსიგან ვერ შექმნის მის კარ-მიდამოს. ხელისუფალი, რომელიც მსგავს ნაბიჯებს დგამს, იგი კიდევ ერთ გზავნილს უგზავნის საზოგადოებას, რომ პანიკურ მდგომარეობაშია", — განაცხადა მელიამ.

აღკვეთის ღონისძიების შეცვლის შესახებ პროცესი დღეს 5 საათზე თბილისის საქალაქო სასამართლოში გაიმართება.

1 ნოემბერს ნაციონალური მოძრაობის ლიდერმა, ნიკა მელიამ საპროტესტო აქციაზე ელქტროსამაჯური მოიხსნა. როგორც ის ამბობს, სამაჯურის ტარებას აღარ აპირებს.

"ეს არის უსამართლობის სიმბოლო. ეს არის ძალადობრივი სამაჯური, რომელსაც მე აღარ შევიბამ. გამორიცხულია. ზუსტად ვიცი, ვიჯდები მე ციხეში თუ ვიქნები თქვენთან ერთად იმ ბრძოლაში უახლოეს დღეებში, ერი გაიმარჯვებს", — განაცხადა ნიკა მელიამ.