ლატვიის საგარეო საქმეთა სამინისტროს განცხადებით, მათ იმედი აქვთ, რომ საერთაშორისო დამკვირვებლების რეკომენდაციები მეორე ტურში გათვალისწინებული იქნება.

"ლატვია მიესალმება 31 ოქტომბერს საქართველოში საპარლამენტო არჩევნების ჩატარებას. არჩევნები ჩატარდა კონკურენტულ გარემოში, ფუნდამენტური თავისუფლების დაცვით, ასევე, COVID-19-ის პანდემიის მიერ შექმნილი გამოწვევები იყო გადალახული. ვიმედოვნებთ, რომ საერთაშორისო დამკვირვებლების მიერ მოცემული რეკომენდაციები დაცული იქნება მეორე ტურის დროს", — წერენ ლატვიაში.

საპარლამენტო არჩევნები საქართველოში 31 ოქტომბერს ჩატარდა. პარლამენტის არჩევნები წელს პირველად პროპორციულთან მიახლოებული, 120/30-ზე სისტემით გაიმართა. ცესკოს გამოცხადებულ შედეგებს ოპოზიცია არ აღიარებს და პერმანენტულად აქციებს გეგმავს. პარტიების ნაწილი ამბობს, რომ სადეპუტატო მანდატებზე უარს იტყვიან, რათა რიგგარეშე არჩევნები ჩატარდეს.

ახალი საარჩევნო სისტემით, პარლამენტში პროპორციული სიისთვის 120 მანდატია გათვალისწინებული. ცესკოს ახლანდელი მონაცემებით, ეს მანდატები პარტიების მოპოვებული ხმების მიხედვით ასე უნდა გადანაწილებულიყო:

  • ქართული ოცნება — 48,15% — 61 მანდატი;
  • ნაციონალური მოძრაობა და ძალა ერთობაშია — 27,14% — 35 მანდატი;
  • ევროპული საქართველო — 3,78% — 5 მანდატი;
  • ლელო — 3,15% — 4 მანდატი;
  • სტრატეგია აღმაშენებელი — 3,15% — 4 მანდატი;
  • პატრიოტთა ალიანსი — 3,15% — 4 მანდატი;
  • გირჩი — 2, 89% — 4 მანდატი;
  • მოქალაქეები — 1,33% — 2 მანდატი;
  • ლეიბორისტული პარტია — 1% — 1 მანდატი.