ქართული ოცნების აღმასრულებელი მდივანი, ირაკლი კობახიძე ფიქრობს, რომ ნიკა მელიას დაკავება პოლიტიკურად მიზანშეწონილი არ არის. მისი თქმით, მელიას მიერ ელექტროსამაჯურის მოიხსნა უხეში კანონდარღვევაა, მაგრამ ის კიდევ უფრო მძიმე პროვოკაციაა.

"როდესაც ამ ასაკის კაცი მუდმივად გამოირჩევა პროვოკაციებით, ეს ძალიან მძიმედ მეტყველებს, ბუნებრივია, მასზე და მის თვისებებზე [...]

ჩვენ უნდა დავამარცხოთ ნიკა მელია ყოველგვარი სამართლებრივი ზომების გარეშე. ამის შემდეგ, რა ზომები მიიღება სამართლებრივად, ეს არის უკვე სხვა საქმეა, მაგრამ, პოლიტიკურად, მე პირადად არ მგონია მიზანშეწონილი მისი დაკავება", — განაცხადა ირაკლი კობახიძემ ქართული ოცნების ოფისში გამართულ ბრიფინგზე.

ნაციონალური მოძრაობის ლიდერმა, ნიკა მელიამ საპროტესტო აქციაზე ელექტროსამაჯური მოიხსნა. როგორც ის ამბობს, სამაჯურის ტარებას აღარ აპირებს.

ნიკა მელიას ელექტროსამაჯური 2019 წლის ივლისში გაუკეთეს. ის ნიკა მელიას სახლიდან გასვლა-შესვლას აფიქსირებდა.

პროკურატურა ნიკა მელიას 20 ივნისს ძალადობრივი ჯგუფის შექმნას ედავება. მას სასამართლომ აღკვეთის ღონისძიების სახით 30 ათასი ლარის ოდენობის გირაო შეუფარდა.