ევროპული საქართველოს ვაკის მაჟორიტარობის კანდიდატი ელენე ხოშტარია მოქალაქეებს 4 საათზე, აქციაზე პარლამენტის წინ შეკრებისკენ მოუწოდებს.

"არჩევნები არა თუ გაყალბებულია, ბიძინა აუქმებს როგორც ინსტიტუტს და ამას არავინ შეეგუება. არავინ არ აპირებს გაჩერებას და 1,2 პროცენტზე ვაჭრობას. 4 ზე პარლამენტთან", — წერს ხოშტარია ფეისბუქზე.

წინასწარი მონაცემებით, ვაკის ოლქში მეორე ტური გაიმართება, რადგან, ცესკოს მონაცემებით, ვერც ელენე ხოშტარიამ და ვერც ოცნების კანდიდატმა, ნოდარ ტურძელაძემ, ხმების 50%-ზე მეტი ვერ მოიპოვა.

ხოშტარიას განცხადებით, მნიშვნელოვანია, რომ ქართულმა ოცნებამ ვერ აიღო მართვის მანდატი, მათ შორის არც ვაკეში. ის მხარდაჭერისთვის ვაკის ამომრჩეველს მადლობას უხდის.

დღეს, 16:00 საათზე ოპოზიცია აქციას მართავს — ასე გამოეხმაურნენ პოლიტიკური ლიდერები ცენტრალური საარჩევნო კომისიის მიერ გუშინ ღამით გამოქვეყნებულ შედეგებს.

"ხვალ 4-ზე ველოდებით ქართველ ხალხს რუსთაველის გამზირზე", — განაცხადა ნიკა მელიამ.