გლდანში აქტივისტ ანა ჭარხალაშვილზე ფიზიკურად იძალადეს. მთავარი არხის გავრცელებულ კადრებში ჩანს, რომ ჭარხალაშვილი უბანთან მყოფ პირებს ეკამათება, შემდეგ კი მასთან მიდის პირი, რომელიც ხელს ურტყამს.

ადგილზე მყოფმა პოლიციამ თავდამსხმელი ჭარხალაშვილს განარიდა, უცნობია დააკავეს თუ არა ის. როგორც პოლიციის დეპარტამენტის ხელმძღვანელმა, ვაჟა სირაძემ განაცხადა, გლდანში მომხდარ დაპირისპირებაზე დაკავებულია 5 პირი.

სირაძის განმარტებით, ისინი პოლიციისადმი დაუმორჩილებლობისა და წვრილმანი ხულიგნობის ბრალდებით არიან დაკავებული. რაც შეეხება სროლის შესახებ გავრცელებულ ინფორმაციას, სირაძე ამბობს, რომ ამას ვერ დაადასტურებს.

"ადგილზე მოხდა ინციდენტი, მხარეებს შორის იყო დაპირისპირება. გავერკვევით სიტუაციაში ამ ეტაპისათვის, პირველადი ინფორმაციით, შინაგან საქმეთა სამინისტროს წარმომადგენელებმა დავაკავეთ 5 პიროვნება", — განაცხადა სირაძემ.

მისი თქმით, შსს ყველა მომხდარ სამართალდარღვევაზე აწარმოებს გამოძიებას და ექნება შესაბამისი რეაგირება.

გლდანის ერთ-ერთ საარჩევნო უბანზე ხმაური იყო, მედიის გავრცელებულ კადრებში ჩანდა, რომ იყო დაპირისპირება როგორც მოქალაქეებს, ასევე, მოქალაქეებსა და პოლიციას შორის. გავრცელდა ინფორმაცია საარჩევნო უბანთან სროლის შესახებ.

2020 წლის საპარლამენტო არჩევნების შესახებ

დღეს 31 ოქტომბერს, საქართველოს პარლამენტის არჩევნები იმართება. წელს პირველად, საარჩევნო სისტემა ყველაზე მეტად მიუახლოვდა სრულად პროპორციულს და არჩევნების 120/30 მანდატების თანაფარდობით ტარდება. აღნიშნული 8 მარტს ოპოზიციისა და მმართველ გუნდს შორის აშშ-ს ელჩის რეზიდენციაში გამართულ არაფორმალურ შეხვედრაზე გადაწყდა. იქვე, სამთავრობო გუნდი და ოპოზიცია, ასევე, შეთანხმდა, რომ პარტია, რომელიც 40%-იან მხარდაჭერას ვერ მოიპოვებს, მთავრობის დაკომპლექტებას ვერ შეძლებს. რაც შეეხება ბარიერს, იგი — 1%-ია.

მთელი ქვეყნის მასშტაბით საარჩევნო უბნები 8 საათზე გაიხსნა და ხმის მიცემის პროცესი დაიწყო. უბნები დღეს 20:00 საათზე დაიხურება.

ისტორიაში პირველად, არჩევნები პროპორციულთან მიახლოებული, 120/30-ზე სისტემით გაიმართება.

გაიგეთ მეტი არჩევნებზე: