ქართული ოცნების აღმასრულებელი მდივანი, ირაკლი კობახიძე მიიჩნევს, რომ მეცხრე მოწვევის პარლამენტის უარყოფით მოვლენად 20 ივნისი დაასახელა. ამის შესახებ მან On.ge-ს ვიდეოპროექტში ისაუბრა, რომელშიც მოქმედი დეპუტატები პარლამენტის დადებით და უარყოფით მოვლენებს ასახელებენ.

ამასთან, ირაკლი კობახიძემ დადებით მოვლენად კონსტიტუციის ახალი რედაქციის მიღება დაასახელა.

2019 წლის 20 ივნისის მოვლენების დროს ირაკლი კობახიძე პარლამენტის თავმჯდომარის პოსტს იკავებდა. მართლმადიდებელი ქვეყნების საპარლამენტო ასამბლეის ღონისძიების დროს, რომელსაც თბილისი მასპინძლობდა, ასამბლეის პრეზიდენტი, რუსეთის დუმის კომუნისტი დეპუტატი, სერგეი გავრილოვი პარლამენტის თავმჯდომარის სკამში ჩაჯდა, რათა სხდომა წაეყვანა.

რუსი დეპუტატის თავმჯდომარის სკამში ჩაჯდომამ მოქალაქეების პროტესტი გამოიწვია, რაც საბოლოოდ მასშტაბურ აქციაში გადაიზარდა. თვითონ კობახიძე ვიზიტით აზერბაიჯანში იმყოფებოდა. აქციის მონაწილეები გავრილოვის ქვეყნიდან წასვლა და კობახიძის გადადგომას მოითხოვდნენ. გარდა ამისა, ისმოდა მთავრობისა და ხელისუფლების გადადგომის მოთხოვნები.

საბოლოოდ, შინაგან საქმეთა სამინისტრომ აქცია რეზინის ტყვიებისა და ცრემლსადენი გაზის გამოყენებით დაშალა. რამდენიმე ასეული ადამიანი დაშავდა. ორმა პირმა თვალი დაკარგა, კიდევ რამდენიმემ მხედველობა.

გავრილოვის ღამის მეორე დღეს ირაკლი კობახიძემ თანამდებობა დატოვა.