ზუგდიდის თავდასხმის მძევალი, დავით ხვიბლიანი აცხადებს, რომ თავდამსხმელს კარგად ჰქონდა შესწავლილი გზა, რომლითაც ბანკის ტერიტორია დატოვეს. მანქანას, რომლითაც თქავდამსხმელმა ბანკის ტერიტორია დატოვა, სწორედ ხვიბლიანი მართავდა. მისი თქმით, მანქანაში ჩაჯდომამდე გააფრთხილა, რომ მართვა კარგად არ იცოდა, მაგრამ მაინც გადაწყვიტა საჭესთან ის დაესვა.

"თითქმის ყველა ჩიხი იცოდა, სადაც მანქანა შემაყვანინა, სადაც გაგვაჩერებინა ვინმე ხომ არ მოგვდევსო. ეს ინფორმაციები თითქმის ყველა იცოდა, სანამ კონკრეტულ ადგილამდე მივიდოდით. გზიდან რომ მიდიხარ და რომ გეტყვის, აქ მოსახვევი შეგხვდება, აქ გადაუხვიე და გაჩერდი", — განაცხადა მან.

ხვიბლიანის თქმით, თავდამსხმელმა უთხრა, რომ წალენჯიხისკენ უნდა წასულიყვნენ. მისივე თქმით, თავდამსხმელი ანელებინებდა მოძრაობას ყოველ გამვლელ მანქანასთან და ამოწმებდა ვინმე ხომ არ უთვალთვალებდა.

ის იხსენებს, რომ გზად ორი მდინარე გაიარეს და მესამის ნაპირას გაჩერდნენ. მისი თქმით, მანქანიდან გადმოსვლის შემდეგ თავდამსხმელმა წყალში გაავლო ხალიჩა, რომელიც მანქანაში მის მხარეს იდო და მას გააწმენდინა ტომარაც, რომელიდანაც ფული ამოიღო.

21 ოქტომბერს საქართველოს ბანკის ზუგდიდის ფილიალში შეიარაღებული პირი შეიჭრა, რომელმაც მძევლები აიყვანა. ის ნახევარ მილიონ დოლარს, ასევე, ვერტმფრენს ან მანქანით, მძევლებთან ერთად ტერიტორიის უსაფრთხოდ დატოვების გარანტიას ითხოვდა. თავდამსხმელი მძევლის შუამავლობით ტელევიზიებს ვიდეოზარით დაუკავშირდა. მოთხოვნების შესასრულებლად თავდამსხმელმა პოლიციას 2 საათი მისცა, თუმცა დროის ამოწურვის შემდეგ მას საჯაროდ ახალი პირობები არ წამოუყენებია.

ღამის 11 საათისთვის თავდამსხმელმა სამ მძევალთან ერთად საქართველოს ბანკის ტერიტორია დატოვა და გაურკვეველი მიმართულებით წავიდა, დანარჩენი მძევლები კი სამართალდამცავებმა შენობიდან გამოიყვანეს. დილის ხუთი საათისთვის ცნობილი გახდა, რომ თავდამსხმელმა სამივე მძევალი გაათავისუფლა და თავად გაიქცა.

მძევლების გარდა თავდამსხმელმა წაიყვანა სამეგრელო-ზემო სვანეთის პოლიციის დეპარტამენტის ხელმძღვანელი ავთანდილ გალდავა. შეიარაღებულ პირთან მოლაპარაკებებს ის აწარმოებდა.

ამ დროისთვის თავდამსხმელის ადგილმდებარეობის ან ვინაობის შესახებ ინფორმაცია არ ვრცელდება. თავდასხმის დროს საქართველოს ბანკში მყოფი არცერთი პირი არ დაშავებულა.

შინაგან საქმეთა მინისტრის, ვახტანგ გომელაურის განცხადებით, სამძებრო სამუშაოები მიმდინარეობს. გარდა ამისა, მან დაადასტურა, რომ მძარცველმა ფული წაიღო, თუმცა რამდენი არ დაუკონკრეტებია. ამასთან, მინისტრმა აღნიშნა, რომ თავდამსხმელს ბიუჯეტის ფული არ წაუღია და მას საქართველოს ბანკის თანხა გაიყოლა.

გაიგე მეტი: