ევროპული საქართველოს წევრი და ვაკეში მაჟორიტარობის კანდიდატი, ელენე ხოშტარია მიიჩნევს, რომ შეცვლილი საარჩევნო სისტემის პირობებში, წინასაარჩევნო კამპანიისას მიხეილ სააკაშვილზე აქცენტი მნიშვნელოვანი არ არის. ამის შესახებ მან On.ge-სთვის მიცემულ ინტერვიუში ისაუბრა.

"მე არ მგონია, რომ ამ პროპორციულ სისტემაში ამხელა აქცენტი მიხეილ სააკაშვილზე არის მნიშვნელოვანი, იმიტომ, რომ ობიექტურად არის ბევრად უფრო დიდი არჩევანი და ეს არ არის არჩევანი მიშასა და ბიძინას შორის. ამიტომ, შეიძლება შინაარსობრივიც იყოს ის ხაზი, რომ ჩემი პარტიის ამ ხაზს არ ვეთანხმები, ასევე ფორმაც. რა თქმა უნდა, შენ ხარ სხვა პარტია, რა თქმა უნდა, ერთის მხრივ, ოპოზიცია შეთანხმებულია, რომ ბიძინა არ უნდა იყოს, მაგრამ არ არის შეთანხმებული ვინ უნდა იყოს პრემიერი. ჩვენ გვაქვს მკაფიო პოზიცია, რომ სააკაშვილი არ უნდა იყოს პრემიერმინისტრი, უბრალოდ ვამბობთ, რომ ეს საკითხი უნდა გადაწყდეს კონსენსუსის გზით. რაც არ უნდა დიდი იყოს პარტია, იმისთვის, რომ ჰყავდეს პრემიერმინისტრი, მას სჭირდება პატარა პარტიების მხარდაჭერა, ამიტომ, ამ პატარა პარტიებს რეალურად აქვთ სიტყვა ამ პროცესში და ეს უნდა გადაწყდეს არჩევნების შემდეგ. ამაში აბსოლუტური თანხვედრა მაქვს პარტიასთან, მაგრამ ამხელა აქცენტი, მე მგონია, რომ ობიექტურად რეალობა არ არის ასეთი", — განაცხადა ხოშტარიამ

რაც შეეხება გამოხატვის ფორმებს, ის ამბობს, რომ "ზოგადად, მუშტები არ მოსწონს არავისთან მიმართებაში".

ევროპული საქართველოს ერთ-ერთი ლიდერმა, გიგი უგულავამ, 12 ოქტომბერს Facebook-ზე გავრცელებულ ვიდეოში მიხეილ სააკაშვილი გააკრიტიკა. უგულავა ამბობდა, რომ კოალიციურ მთავრობაში მიხეილ სააკაშვილი არ უნდა იყოს.

ელენე ხოშტარიამ იმ დღესვე გააკეთა განცხადება, რომ საკუთარი პარტიის კამპანიის ფორმას, "მუშტი ბიძინას, იდაყვი მიშას" არ ეთანხმებოდა.