პროკურატურის ცნობით, ნაფიცი მსაჯულების მიერ ერთხმად გამოტანილი ვერდიქტის საფუძველზე, დოდო გუგეშაშვილის განზრახ მკვლელობის მცდელობისა და მისი შვილის მკვლელობის საქმეზე ბრალდებულს 20 წლით თავისუფლების აღკვეთა მიესაჯა.

უწყების ცნობით, გამოძიებით დადასტურდა, რომ 2018 წლის 7 თებერვალს ბრალდებულმა საკუთარ საცხოვრებელ სახლში გულმკერდის არეში მძიმედ დაჭრა დოდო გუგეშაშვილი, ხოლო ნოდარ გუგეშაშვილის მიმართულებით ცეცხლსასროლი იარაღიდან ორჯერ გაისროლა, რის შედეგადაც იგი ადგილზე გარდაიცვალა.

"სასამართლო პროცესზე ბრალდების მხარემ დაზარალებული დოდო გუგეშაშვილი და მისი საცხოვრებელი კორპუსის სხვა მობინადრეები დაკითხა, რომლებმაც ბრალდებული, როგორც დანაშაულის ჩამდენი პირი ამოიცნეს. ასევე, პროკურორებმა სასამართლოს წარუდგინეს სატელეფონო კავშირების ამსახველი ინფორმაცია, ვიდეომასალა და ექსპერტიზის დასკვნები, რომლითაც ბრალდებულის მიერ დანაშაულის ჩადენის ფაქტი უტყუარად დადასტურდა",— ვკითხულობთ განცხადებაში.

დოდო გუგეშაშვილის დაჭრისა და მისი შვილის განზრახ მკვლელობის ბრალდებით ერთი პირი 2020 წლის 24 იანვარს დააკევეს. აფხაზეთის ომის ვეტერანი და ყოფილი მხედრიონელი, დოდო გუგეშაშვილი ცეცხლსასროლი იარაღით დაჭრეს, მისი შვილი კი მოკლეს. ინციდენტი გუგეშაშვილის სახლში, თბილისში 2018 წლის 7 თებერვალს მოხდა.