მიუხედავად იმისა, რომ ბილი აილიში 18 წლის ასაკში დღეს ერთი-ერთ ყველაზე წარმატებულ შემსრულებლად ითვლება, გრემის ოთხი მთავარი ჯილდო ერთდროულად მოიგო, რითიც რეკორდსმენი გახდა და ოსკარების დაჯილდოებაზე იმღერა, ვიღაცები მაინც ახერხებენ, რომ მის გასაკრიტიკებლად ისეთი კრიტერიუმები გამოიყენონ, როგორიც სხეულის ფორმები და ზომაა.

12 ოქტომბერს ბილი აილიშის პაპარაცული ფოტო გამოქვეყნდა, რომელშიც მომღერალს თავისი სასცენო იმიჯის ნაცვლად ყოველდღიური სამოსი — შორტი და მაისური აცვია. რატომღაც ამის გამო სოციალურ ქსელებში ზოგიერთმა მომხმარებელმა უფლება მისცა თავს, რომ ის გარეგნობის გამო გაექილიკებინა:

"10 თვეში ბილი აილიში 30 წელს გადაცილებულ ალკოჰოლის მოყვარულ დედიკოს დაემსგავსა", — წერს 29 წლის კაცი.

ტვიტერის ამ მომხმარებლის კომენტარი ქალის სხეულის მიმღებლობასა და ზოგადად სილამაზის სტანდარტების შესახებ განხილვების საგნად იქცა.

"ინტერნეტში გავრცელებული პაპარაცული ფოტოთი გაირკვა, რომ 18 წლის ბილი აილიშს თავისი ჩვეული გრძელი, მომჩვარული სამოსის მიღმა — გაოცდებით, საშინელებაა! — ისეთივე ჩვეულებრივი სხეული აქვს, როგორც თქვენ ან მე", — სარკასტულად აღნიშნავს The Guardian-ის ჟურნალისტი პაპი ნორი.

სოციალურ ქსელებში ამ საკითხს გამოეხმაურა სხვა ათასობით ადამიანიც:

"აი, ასე ასწავლის პორნო და სოციალური მედია კაცებს, რომ ბილი აილიშის მსგავსი სხეულები "მსუქანია" და ნორმას არ შეესაბამება", — წერს ერთ-ერთი მომხმარებელი ტვიტერზე.

სოციალურ ქსელებში ამ საჯარო განხილვებს კიდევ ერთი მომხმარებელი შემდეგნაირად გამოეხმაურა:

"ბილი აილიშის ფოტოზე რეაქციების გამო გაცოფებული ვარ, რადგან ის სრულიად ნორმალურად გამოიყურება, მაგრამ იმის გამო, რომ ვიღაცებს პორნოს გარდა ქალის სხეული არასდროს უნახავთ, ახალგაზრდა ქალებმა უნდა იფიქრონ, რომ მათ სრულიად ჩვეულებრივ სხეულებს რამე სჭირს".

ეს ფაქტი უყურადღებოდ არც თავად ამ ცნობილ თინეიჯერ შემსრულებელს დარჩენია და მის სხეულთან დაკავშირებულ შეფასებებს ვიდეოს გაზიარებით გამოეხმაურა, რომლის ავტორიც სილამაზის სტანდარტებს აკრიტიკებს.

"არ შეიძლება ჩვენი რეალური სხეულები ჩვეულებრივად მივიღოთ?" — ისმის კითხვა ვიდეოში.

მან ასევე გამოაქვეყნა ფოტო წარწერით:

"მართლა გინდათ წარსულში დაბრუნება?"

View this post on Instagram

do you really wanna go back in time?

A post shared by BILLIE EILISH (@billieeilish) on

აღსანიშნავია, რომ ეს პირველი შემთხვევა არ არის, როცა ბილი აილიშს თავის გარეგნობის შესახებ დამამცირებელ შეფასებებთან გამკლავება უწევს: რამდენიმე თვის წინ ინტერვიუში განაცხადა, რომ დიდი ზომის ტანსაცმლის ჩაცმა სწორედ მსგავსი წარმოდგენების გამო დაიწყო.

"ერთადერთი მიზეზი, რის გამოც ასე ჩაცმა გადავწყვიტე, იყო ის, რომ საკუთარი სხეული მძულდა", — თქვა აილიშმა.

ამის მიუხედავად, მომღერალი თამამად განაგრძნობს საკუთარი ინდივიდუალური ბუნების გამოხატვას და იმ უსამართლო, შემზღუდველ სტანდარტებთან ბრძოლას, რომლებიც არა მხოლოდ მას, არამედ სხვა მილიონობით ქალსაც აყენებს ზიანს. ამის საილუსტრაციოდ მან რამდენიმე თვის წინ სპეციალური ვიდეოც გამოაქვეყნა, რომელშიც სწორედ იმ ადამიანებს მიმართავს, ვინც სხვებს მათი სხეულის ფორმებისა და ზომის გამო განსჯის.

"ისურვებდით, რომ უფრო პატარა ვიყო? უფრო სუსტი? უფრო ნაზი? უფრო მაღალი?

ისურვებდით, რომ ჩუმად ვიყო?

გაღიზიანებთ ჩემი მხრები? ჩემი მკერდი? მე ის ვარ, რაც ჩემი მუცელია ან ჩემი ბარძაყი?

სხეული, რომლითაც დავიბადე, ის არაა, რაც თქვენ გინდოდათ?

თუ ის მაცვია, რაც კომფორტულია, ქალი არ ვარ, ხოლო თუ გავიხდი, მაშინ მეძავი ვარ", — ამბობს მომღერალი ვიდეოში.