დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

საქართველოს პრემიემინისტრ გიორგი გახარიას თქმით, ქვეყანაში კორონავირუსით ინფიცირებულთა რაოდენობის ზრდა რესტორნების მუშაობის ვადის შეზღუდვითაც არ შეჩერდება და უახლოეს დღეებში ათასს გადააცილებს.

"ნურავის ჰგონია, რომ ამით ინფიცირებულების რაოდენობის ზრდა შეჩერდება. არ შეჩერდება. უბრალოდ, ჩვენ ამით შეგვიძლია ზემოქმედება მოვახდინოთ დროზე, რა სისწრაფით მოხდება ინფიცირებულთა რაოდენობის ზრდა. ეს სისწრაფის კონტროლში მოგვეხმარება", — განაცხადა გახარიამ მთავრობის სხდომის დასრულების შემდეგ გამართულ ბრიფინგზე.

მან აღნიშნა, რომ ყველაზე ქმედითი ინსტრუმენტი პირბადის ტარება და დისტანციის დაცვაა. ამიტომ, მისივე თქმით, რაც უფრო მეტი პირბადიანი ადამიანი იქნება ქვეყანაში, ინფექციის გავრცელება და სიკვდილიანობაც ნაკლები იქნება.

15 ოქტომბერს საქართველოში კორონავირუსის 919 ახალი შემთხვევა დაფიქსირდა, გამოჯანმრთელდა — 208, გარდაიცვალა — 4.

საქართველოში სულ 14 440 დადასტურებული შემთხვევაა, მათგან 7 367 უკვე გამოჯანმრთელდა, გარდაიცვალა — 113.

ამ დროისთვის კარანტინის რეჟიმში 5 792 ადამიანი იმყოფება, სტაციონარში მეთვალყურეობის ქვეშ — 836, კოვიდ სასტუმროში 1 042 პირი მკურნალობს.