კარტოგრაფების საქმეზე ბრალდებული ივერი მელაშვილის ცოლის, თამარ სულაძის განცხადებით, მის ქმარს ჰკითხეს, გააკეთებდა თუ არა მეორე დაკავებული ნატალია ილიჩოვა რაიმეს ქვეყნის საწინააღმდეგოდ, რადგან ის ეთნიკურად რუსია. სულაძის თქმით, მელაშვილმა მათ უპასუხა, რომ ილიჩოვა რუსია, მაგრამ ბევრ ქართველს სჯობს და პატრიოტულ საქმეს აკეთებს.

"მე ვკითხე ჩემს მეუღლეს — ხომ არ მოახდენენ ზეწოლას სხვა კომისიის წევრებზე, რომ თქვენ წინააღმდეგ ან იმის [ნატალია ილიჩოვა] წინააღმდეგ ხმა მისცენ? არ არის გამორიცხულიო მითხრა. გამოკითხვის დროს მე მითხრესო, რომ ნატალია რუსია და იქნებ იმან რაღაც გააკეთა ისეთიო. ჩემმა მეუღლემ მითხრა, გამეცინა და ვუთხარი — ბევრ ქართველს ჯობია, ისეთ საქმეს აკეთებს, ისეთ პატრიოტულ საქმესო", — განაცხადა თამარ სულაძემ TV პირველთან საუბრისას.

საქართველო-აზერბაიჯანის საზღვრის საქმე

29 სექტემბერს საქართველოს გენერალურმა პროკურატურამ განაცხადა, რომ 17 აგვისტოს თავდაცვის სამინისტროსგან მიიღეს ინფორმაცია, რომელიც ეხებოდა საქართველო-აზერბაიჯანის საზღვრის დელიმიტაცია-დემარკაციის კომისიის საქმიანობას. მათივე განცხადებით, დაიწყო გამოძიება, რომელიც უცხო ქვეყნისათვის საქართველოს ტერიტორიის ნაწილის გაცემისკენ მიმართული მოქმედებას ეხებოდა. როგორც უწყებაში ამბობენ, საქართველოს საზიანოდ მეზობელი ქვეყანისთვის 3 500-მდე ჰა ფართობი მიწის გადაცემის საფრთხე შეიქმნა.

2 ოქტომბერს, პირველმა არხმა გაავრცელა ინფორმაცია, რომ ორიგინალი რუკებისა, რომლის საფუძველზეც პროკურატურამ აზერბაიჯანთან საზღვრის დადგენის საქმეზე გამოძიება დაიწყო, ქართულ მხარეს ბიზნესმენმა, დავით ხიდაშელმა გადასცა. ვრცელდება ინფორმაცია იმაზეც, რომ რუკების დედნები მან რუსეთში საგარეო დაზვერვის დახმარებით მოიპოვა.

გაიგეთ მეტი რუკებზე:

საგამოძიებო ორგანოებმა ამ საქმეზე საზღვრის დამდგენი კომისიის წევრების, ივერი მელაშვილისა და ნატალია ილიჩოვას სახლები და სამუშაო ოფისები გაჩხრიკეს. ორივე მათგანი გამოძიების დაწყებას პოლიტიკას და არჩევნებს უკავშირდება.

7 ოქტომბერს კომისის წევრები დააკავეს. 9 ოქტომბერს კი ილიჩვასა და მელაშვილის აღკვეთის ღონისძიების სახით სასამართლომ პატიმრობა შეუფარდა.

ოპოზიცია მიმდინარე გამოძიებას წინასაარჩევნო პროცესს უკავშირებს. ნაწილი აცხადებს იმასაც, რომ ყარაბაღში მიმდინარე კონფლიქტის ფონზე მსგავსი გამოძიება პარტნიორ ქვეყანასთან ურთიერთობის დაძაბვის მცდელობაა. არასათავრობო ორგანიზაციები ამბობენ, რომ საზღვარზე გამოძიება აჩენს ეჭვს პოლიტიკურ მოტივაციებზე.

მმართველ გუნდში ამას უარყოფენ და ამტკიცებენ, რომ მეზობელ ქვეყანასთან ურთიერთობას ვერაფერი დააზიანებს.

გაიგეთ მეტი: