რუსეთის საგარეო საქმეთა სამინისტროში საქართველოს საგარეო საქმეთა სამინისტროს ბრალდებას 6-7 ოქტომბერს ჟენევაში დაგეგმილი მოლაპარაკებების ჩაშლის შესახებ უსაფუძვლო და პოლიტიზირებული უწოდეს. ოკუპანტი ქვეყნის საგარეო უწყების ოფიციალურმა წარმომადგენელმა, მარია ზახაროვამ განაცხადა, რომ ჟენევის დისკუსიების რაუნდი ლოგისტიკური, კერძოდ, კორონავირუსის პანდემიის მიზეზით გადაიდო. ზახაროვას კომენტარს რუსეთის სახელისუფლებო მედია ტასი ავრცელებს.

ზახაროვამ აღნიშნა, რომ პანდემიის გამო, 6-7 ოქტომბერს გასამართ დისკუსიაში მონაწილეობისგან რუსეთის გარდა, თავი ოკუპირებული აფხაზეთისა და სამხრეთ ოსეთის დე ფაქტო დელეგაციების წარმომადგენლებმაც შეიკავეს. ალტერნატივად კი, მისივე თქმით, შეხვედრის დისტანციურად გამართვა შესთავაზეს. რუსეთის საგარეოს პრესსპიკერი ამბობს, რომ მომდევნო რაუნდის ვიდეო კონფერენციის ფორმატში ჩატარებას, ქართული მხარე არ დათანხმდა.

"რუსეთი საქართველოსთან დიალოგს არასდროს არიდებდა თავს, მათ შორის ჟენევის საერთაშორისო დისკუსიების ფარგლებშიც და მოლაპარაკებების პროცესის გაგრძელებისთვის ძალ-ღონეს არ ვიშურებთ", — განაცხადა მან.

ზახაროვამ, აგრეთვე აღნიშნა, რომ 6 ნოემბერს დისკუსიის თანათავმჯდომარეების ვიზიტს მოსკოვში ელოდებიან.

საქართველოს საგარეო საქმეთა სამინისტროში დღეს განაცხადეს, რომ რუსეთის ფედერაციის წარმომადგენლებმა ჟენევის საერთაშორისო მოლაპარაკებების 51-ე რაუნდი ჩაშალეს.

უწყების განცხადებით, საქართველოს ოკუპირებულ ტერიტორიებზე გამწვავებული უსაფრთხოებისა და ჰუმანიტარული მდგომარეობის გათვალისწინებით, ჟენევის საერთაშორისო მოლაპარაკებების თანათავმჯდომარეების გადაწყვეტილებით, კორონავირუსის პანდემიის მიუხედავად, 51-ე რაუნდის ჩატარება მიმდინარე წლის 6-7 ოქტომბერს იყო დაგეგმილი და შეთანხმებული.