სომხეთის პრემიერმინისტრის, ნიკოლ ფაშინიანის შვილი ჯარში მოხალისედ ჩაეწერა. ამის შესახებ ფაშინიანმა საკუთარ ფეისბუქგვერდზე დაპოსტა ტექსტით — "ჩვენი შვილი ჯარში ჩაეწერა".

ამ პოსტს კი მოყვა ფაშინიანის შემდეგი პოსტი, რომლითაც ხალხს მოუწოდებდა, რომ წვევამდელებისთვის ტრანსპორტირებით დახმარება გაეწიათ, რათა თავიანთი რეგიონებიდან ცენტრალური შეკრების ადგილამდე მისულიყვნენ.

"მათ, ვისაც ტრანსპორტის პრობლემა აქვთ, უნდა შეიკრიბონ სამხედრო კომისარიატში, რათა რეგიონებიდან ერევნის მიმართულებით წავიდნენ. მოქალაქეებიც მზად არიან საკუთარი ავტომობილებით მათ დახმარება აღმოუჩინონ. ეს პროცესი 24 საათიანია ", — ნათქვამია ფაშინიანის პოსტში.

რამდენიმე საათით ადრე კი ფაშინიანმა ვიდეომიმართვა გაავრცელა, სადაც სამხედროებს, რომლებმაც სამხედრო სამსახური გასულ წელს დაასრულეს, მოხალისეებად ჩაწერისკენ მოუწოდებდა.

ერთ კვირაზე მეტია მთიან ყარაბაღში სომხეთ-აზერბაიჯანის სამხედრო დაპირისპირება გრძელდება. 27 სექტემბრიდან ფართომასშტაბიანი სამხედრო მოქმედებები მთიან ყარაბაღსა და სომხეთ-აზერბაიჯანის საზღვარზე ამ დრომდე მიმდინარეობს. ორივე მხარე ავრცელებს ინფორმაციას დაღუპულებზე. კონფლიქტში მონაწილე ორივე მხრიდან გარდაცვლილია 300-მდე, როგორც სამხედრო, ასევე, სამოქალაქო პირი, დაჭრილია 1 000-მდე მოქალაქე.

საერთაშორისო თანამეგობრობა მხარეებს ცეცხლის შეწყვეტისა და მოლაპარაკებების განახლებისკენ უშედეგოდ მოუწოდებს. სხვა ქვეყნებისგან განსხვავებული პოზიცია აქვს თურქეთს, რომელიც მომხდარში მხოლოდ სომხეთს ადანაშაულებს და აზერბაიჯანს მხარდაჭერას უცხადებს. სომხეთსა და მთიან ყარაბაღში ამტკიცებენ, რომ ბრძოლებში ჩართულია თურქული არმიაც, რასაც აზერბაიჯანსა და თურქეთში უარყოფენ.