თურქეთის უშიშროების სამსახურმა გამოაქვეყნა იმ პირის ფოტოები, რომელიც ეჭვმიტანილია სტამბოლში, ღამის კლუბ რეინაზე თავდასხმაში. სამართალდამცავები თავდამსხმელს უკვე მესამე დღეა ეძებენ, თუმცა უშედეგოდ. მათი განცხადებით, ფოტოს გარდა მათთვის ხელმისაწვდომია აღნიშნული პირის თითის ანაბეჭდებიც.

თურქული მედიის ცნობით, ღამის კლუბზე თავდასხმა ახალი წლის დადგომიდან მალევე, 01:20 საათზე მოხდა. თავდამსხმელი ღამის კლუბთან ტაქსით მივიდა და ცეცხლი პირველად ჯერ დაცვის თანამშრომლებს გაუხსნა, რომლებიც შეუიარაღებელნი იყვნენ, შემდეგ კი სროლა შიგნით გააგრძელა. თავდასხმის შედეგად 39 ადამიანი დაიღუპა, რომელთა უმრავლესობა უცხოელი ტურისტები არიან, დანარჩენები კი - თურქეთის მოქალაქეები.

როგორც თურქული გამოცემა, Hurriyet Daily News სამხედრო ექსპერტებზე დაყრდნობით წერს, თავდამსხმელი კარგად გაწვრთნილის შთაბეჭდილებას ტოვებდა, რადგან ჩანაწერების მიხედვით, ის პროფესიონალურად იყენებდა იარაღს.

მომხდარზე პასუხისმგებლობა უკვე აიღო ტერორისტულმა ორგანიზაციამ, ისლამურმა სახელმწიფომ.