ტერორისტულმა ორგანიზაცია ისლამურმა სახელმწიფომ აიღო პასუხისმგებლობა სტამბოლში, ღამის კლუბ რეინაში განხორციელებულ ტერაქტზე. ინფორმაციას ამის შესახებ The Guardian ავრცელებს. ბრიტანული გამოცემა თურქულ მედიაზე დაყრდნობით წერს, რომ თავდასხმა ჩაიდინა უზბეკეთის, ან ყირგიზეთის მოქალაქემ, რომელიც ISIS-ის დავალებით მოქმედებდა.

ღამის კლუბ რეინაში მომხდარი თავდასხმის შედეგად 39 ადამიანი დაიღუპა, მათგან 15 უცხოელია.

თურქეთის დროით 1 იანვარს, 01:30 საათზე, შეიარაღებულმა პირმა კლუბში მყოფებს ცეცხლი გაუხსნა. თურქეთის შინაგან საქმეთა მინისტრის თქმით, თავდამსხმელი მიმალულია და ის მარტო მოქმედებდა:

"ეს იყო ხოცვა-ჟლეტა, ნამდვილი არაადამიანური სისასტიკე".

თავდასხმას გადარჩენილებიდან ზოგი მძიმედაა დაშავებული. 69 ადამიანი საავადმყოფოშია გადაყვანილი. მათგან 4 უმძიმეს მდგომარეობაშია.

თავდაპირველად უცხოურმა მედიებმა გაავრცელეს ინფორმაცია, რომ თავდამსხმელი სანტა-კლაუსის ფორმას ატარებდა, თუმცა ცოტა ხნის წინ გაშიფრული ვიდეო-კადრების მიხედვით, თავდასხმაში ეჭვმიტანილი კლუბის გარეთ მუქი ფერის ტანსაცმლით გადააადგილდება.

თურქეთის ოფიციალური პირები მიიჩნევენ, რომ თავდამსხმელმა კლუბი შესაძლოა სხვა ტანსაცმლით დატოვა.