ბელარუსი ევროკავშირს საპასუხო სანქციებს უწესებს. ბელარუსის საგარეო საქმეთა სამინისტროს განცხადებით, ევროპელ მაღალჩინოსნებს ქვეყანაში შესვლა აეკრძალებათ. მათივე თქმით, დიპლომატიური პრაქტიკის თანახმად, ისინი სიას არ გაასაჯაროებენ.

"ბელარუსი სიტყვითაც და ქმედებითაც ყოველთვის კონფრონტაციის წინააღმდეგია. ჩვენ დიალოგისა და გაგების მომხრეები ვართ. მაგრამ როგორც სუვერენული სახელმწიფო, თუმცა არა სინანულის გარეშე, ჩვენი ინტერესების დაცვის მიზნით არამეგობრულ ქმედებებს ვუპასუხებთ", — ნათქვამია საგარეო უწყების განცხადებაში.

2 ოქტომბერს ევროკავშირის ქვეყნებმა ბელარუსის წინააღმდეგ სანქციები შეათანხმეს. ამის შესახებ ევროპული საბჭოს თავმჯდომარემ, შარლ მიშელმა ისაუბრა. მისი თქმით, შეზღუდვები 40 პირს შეეხება და მათ შორის პრეზიდენტი ალექსანდრ ლუკაშენკო არ იქნება.

როგორც საფრანგეთის პრეზიდენტმა, ემანუელ მაკრონმა განაცხადა, სიაშია ლუკაშენკოს შეყვანა მოლაპარაკებებისთვის გზას ჩახერგავდა. მისი თქმით, თუ პრეზიდენტი თავის ხალხთან დიალოგს არ დაიწყებს, მას სიაში სამომავლოდ შეიყვანენ.

აგვისტოს ბოლოს ევროკავშირის ქვეყნებმა ბელარუსის საპრეზიდენტო არჩევნების შედეგები არ აღიარეს. ისინი ბელარუსის ხელისუფლებას ახალი არჩევნების ჩატარებისკენ მოუწოდებენ.

ევროკავშირის ერთობლივი სანქციებისგან განსხვავებით, კანადამ და დიდმა ბრიტანეთმა ინდივიდუალურ სანქციებში ალექსანდრ ლუკაშენკოც შეიყვანეს. სიები გამოაქვეყნეს ბალტიისპირეთის ქვეყნებმაც.